O‘zbekiston tashqi ishlar vaziri Abdulaziz Komilov “Yangi O‘zbekiston” gazetasiga bergan intervyusida mamlakatning Kollektiv xavfsizlik shartnomasi tashkiloti (ODKB)da ishtiroki qayta tiklanishi to‘g‘risidagi savollarga javob berdi.
Komilovga ko‘ra, tashqi tajovuz holatida qurolli kuchlardan foydalanish huquqi inkor etib bo‘lmaydigan hodisa va aksariyat mamlakatlarning xavfsizlik sohasidagi milliy konsepsiyalari, shuningdek, harbiy-siyosiy blok shaklidagi turli birlashmalar doktrinalarining ajralmas qismi hisoblanadi.
“O‘zbekiston esa hamisha barcha masalalarning, ayniqsa, uzoq o‘n yilliklar mobaynida barcha qo‘shni mamlakatlarda tashvish uyg‘otib kelgan Afg‘onistondagi nizoning tinch yo‘l bilan hal etilishini yoqlagan va yoqlaydi. Biz afg‘on muammosini hal etishning harbiy yo‘li yo‘q ekanini doimo ta’kidlab kelganmiz. Bugungi kunda jahon hamjamiyatida bu nuqtayi nazarga ko‘pchilik xayrixohlik qilmoqda. Afg‘onistondan xalqaro koalitsiya qo‘shinlari olib chiqilgani ham bizning yondashuvimiz to‘g‘ri ekanini ko‘rsatdi”, — deydi Komilov.
Shuningdek, Abdulaziz Komilov O‘zbekiston milliy qonunchiligi, jumladan, Tashqi siyosiy faoliyat konsepsiyasi va Mudofaa doktrinasiga muvofiq, mamlakat harbiy bloklarda ishtirok etmasligi to‘g‘risida bir-necha bor bayonot berilganini eslatib o‘tgan.
“Bundan tashqari, bugungi kunda mamlakatimiz o‘z milliy xavfsizligini ta’minlash uchun yetarli salohiyatga ega ekani ham amaliy jihatdan o‘ta muhimdir. O‘zbekistonda harbiy qurilish sohasidagi islohotlar muvaffaqiyatli bormoqda, milliy armiyaning harbiy-texnikaviy bazasi mustahkamlanmoqda”, — deya qayd etadi tashqi ishlar vaziri.
“Markaziy Osiyoda mintaqa mamlakatlari yirik sheriklar bilan muloqotining ‘5+1’ shaklida muvozanatlashgan mexanizmlar tizimi mavjud. Bunday platformalar Rossiya, AQSh, Yevropa Ittifoqi, Xitoy, Hindiston, Janubiy Koreya, Yaponiya bilan munosabatlarda amal qilmoqda. Shuning bilan birgalikda, mintaqada KXShTdan tashqari, MDH va ShHT singari tashkilotlar ham faoliyat ko‘rsatmoqda. Ularning doirasida dolzarb masalalar, xususan, mintaqaviy xavfsizlik ta’minlanishiga, shuningdek, Afg‘oniston muammosiga doir masalalar muhokama etilmoqda.
Yaqinda Dushanbe shahrida bo‘lib o‘tgan va Afg‘onistondagi vaziyatning muhokamasiga bag‘ishlangan KXShT sammiti hamda ShHT+KXShT formatidagi uchrashuvda O‘zbekiston faxriy mehmon, shuningdek, ShHT a’zosi sifatida ishtirok etgani ham vazmin va amaliy diplomatiyamizning tarkibiy jihati hisoblanadi”, — deydi u.
Eslatib o‘tamiz, O‘zbekiston tashqi ishlar vaziri Abdulaziz Komilov 2017-yili O‘zbekiston KXShTga qayta a’zo bo‘lmasligini ma’lum qilgan edi. O‘shanda vazir O‘zbekiston o‘zining hech qanday harbiy yoki siyosiy bloklarga qo‘shilmaslik konsepsiyasiga sodiq qolishini ta’kidlagan edi.
Izoh (0)