АҚШ собиқ давлат котиби Колин Пауэлл 18 октябрь куни коронавирус оқибатида вафот этди. Бу ҳақда унинг Facebook’даги саҳифасида маълум қилинди.
«Генерал Колин Пауэлл бугун эрталаб COVID-19 билан боғлиқ асоратлардан вафот этди», — дейилади хабарда.
Колин Пауэлл қарийб ярим аср мобайнида Пентагон, Оқ уй ва Давлат департаментида турли лавозимларда ишлаган. Хусусан, 1987 йилдан 1989 йилгача у АҚШ президенти Рональд Рейган маъмуриятида миллий хавфсизлик бўйича маслаҳатчи бўлиб ишлаган, 1989—1993 йилларда эса Штаб бошлиқлари қўшма қўмитаси раиси бўлиб, бу лавозимда энг ёш одам ва биринчи афроамерикалик бўлган.
2001 йилда Колин Пауэлл АҚШнинг 43-президенти Жорж Буш маъмуриятида давлат котиби лавозимини эгаллаган биринчи афроамерикалик бўлди. 2003 йилда у БМТ Хавфсизлик Кенгашига мурожаат қилиб, АҚШнинг Ироққа бостириб киришини оқлади.
У АҚШнинг совуқ урушдан кейинги энг йирик ҳарбий ҳаракатлари — «Чўл бўрони» операцияси ва Ироққа бостириб киришига тайёргарлик кўришда қатнашган.
Унинг ўлими муносабати билан Ўзбекистон Ташқи ишлар вазирлиги ҳамдардлик билдирди.
«Америка Қўшма Штатларининг йирик давлат арбобларидан бири Колин Лютер Пауэллнинг 84 ёшида вафот этгани ҳақидаги хабарни чуқур қайғу билан қабул қилдик.
Колин Пауэлл турли йилларда Америка ҳукуматида нуфузли лавозимларда фаолият юритган. Жумладан, Штаб бошлиқлари бирлашган қўмитаси раиси, АҚШ президентининг Миллий хавфсизлик масалалари бўйича маслаҳатчиси, Қўшма Штатлари Давлат котиби сифатида ишлаган.
Колин Пауэлл Ўзбекистон—Америка алоқаларининг ўрнатилиши ва тараққиётига салмоқли ҳисса қўшган. 2002 йил 13 март куни Ўзбекистон Республикаси ташқи ишлар вазири Абдулазиз Комилов ва Америка Қўшма Штатлари давлат котиби Колин Пауэлл Стратегик шериклик ва ҳамкорлик асослари ҳақидаги Декларацияни имзолаган. Мазкур ҳужжат икки томонлама муносабатлар тарихида муҳим ўрин тутган.
Ушбу жудолик муносабати билан марҳумнинг яқинлари ҳамда оила-аъзоларига чуқур ҳамдардлик ва таъзия изҳор этамиз», — дейилади хабарда.
Изоҳ (0)