Britaniya parlamenti deputati Devid Emess 15-oktabr kuni kechqurun saylovchilar bilan uchrashuv chog‘ida o‘ldirildi. Unga pichoq bilan hamla qilishdi. Uchrashuv Londondan 65 km sharqdagi Esseks grafligida joylashgan Li-on-Si dengizbo‘yi shahrida metodistlar cherkovidagi deputat qabulxonasida bo‘lib o‘tgan. Buyuk Britaniya bosh vaziri Boris Jonson Emessni “katta siyosatdagi eng yaxshi, xushfe’l va olijanob odamlardan biri” deb atadi. Jamoatchilik palatasi spikeri Lindsi Xoyl ushbu qotillik “butun mamlakatdagi parlament a’zolari orasida shok holatini qo‘zg‘atgani”ni aytdi. Emess oilali bo‘lib, besh nafar farzandi bor edi.
Qotillikda gumonlanib, kelib chiqishi somalilik bo‘lgan 25 yoshli Britaniya fuqarosi qo‘lga olindi. Hujum terakt deb ataldi. Gumonlanuvchining ismi oshkor etilmayapti, ammo politsiya hujumga aloqador bo‘lishi mumkin bo‘lgan boshqa shaxs qidirilmayotganini aytdi. The Guardian politsiyadagi manbalariga tayanib yozishicha, gumonlanuvchi avvalroq ehtimoliy “radikalizatsiya” nuqtayi nazaridan maxsus xizmatlar diqqat markaziga tushgan.
Emess parlamentga birinchi marta 1983-yilda saylangan. U abortlarga qarshiligi va hayvonlarni himoya qilishi bilan tanilgan. Konservativ partiya a’zosi Emess 1983-yilda Buyuk Britaniya hukumati tepasida Margaret Tetcher bo‘lgan vaqtda Jamoatchilik palatasi deputatiga aylangan va 38 yil davomida Britaniya parlamentida o‘z partiyasining an’anaviychilar qanotiga tegishli bo‘lib keldi. Cherkovga muntazam qatnovchi katolik sifatida u, xususan, abortlarni taqiqlash tarafdori bo‘lgan. Brexit haqidagi referendumdan avval mamlakatning Yevroittifoqdan chiqishini qo‘llab-quvvatlagan. Ayni vaqtda u hayvonlar huquqlarini himoya qilib, an’anaviy ovchilikning ba’zi turlarini taqiqlashni yoqlab chiqqan.
Emess — so‘nggi besh yil ichida o‘ldirilgan britaniyalik ikkinchi deputat. 1979-yildan buyon esa o‘ninchisi. 2016-yilda Buyuk Britaniyaning Yevroittifoqdan chiqishi bo‘yicha referendumga bir hafta qolganida o‘ta o‘ngchi Tomar Meir Leyboristlar partiyasidan deputat Jo Koksni otib tashlagan edi, u mamlakatni Yevroittifoq tarkibida saqlab qolish tarafdori edi. Uning o‘limidan keyin Emess deputatlar uchun xavfsizlik choralarini kuchaytirish zarurligini aytdi va bunday hujumlar “siyosatchilarning xalq bilan to‘g‘ridan to‘g‘ri muloqotidan iborat buyuk britancha an’anaga zarba berayotgani”ni ta’kidladi. 2010-yilda yana bir leyborist deputat Stefan Timms saylovchilar bilan uchrashuvda ikki marta pichoq bilan yaralangan edi.
Saylovchilar bilan ochiq uchrashuvlar Buyuk Britaniyada parlament siyosatining muhim tarkibi hisoblanib, deputatlarga saylovchilar bilan doimiy va bevosita aloqada bo‘lib turish imkoniyatini beradi. Bunday uchrashuvlarda parlament a’zolariga maxsus qo‘riqchilar hamrohlik qilmaydi, Emess bilan bog‘liq vaziyatda ham shunday bo‘lgan: davlat tomonidan jismoniy himoya deputatlar uchun faqat parlament binosida kafolatlangan, boshqa holatlar uchun esa ularga maxsus ko‘rsatmalardan o‘tish taklif qilinadi. 2019-yilgi parlament kampaniyasi chog‘ida deputatlarning ko‘pchiligi ijtimoiy tarmoqlarda va izohlarda tahdidlar ko‘payganidan shikoyat qilgandi. Bu haqda Emessning o‘zi ham gapirgan. Jamoatchilik palatasi spikeri Lindsi Xoyl ma’lum qilishicha, parlament a’zolari tez orada xavfsizlik choralarini kuchaytirish masalasini muhokama qiladi.
Izoh (0)