AQSh sudi millioner va ko‘chmas mulk sohibi Robert Dyorstni 21 yil avvalgi qotillik uchun umrbod qamoq jazosiga hukm qildi. Bu haqda CNN xabar berdi.
Sentabr oyining boshida sud hay’ati 78 yoshli Dyorstni jinoyat sodir etganlikda aybdor deb topgandi.
Kaliforniya qonuniga ko‘ra, muayyan holatlarda qotillik qilganlar o‘lim yoki umrbod qamoq jazosiga hukm qilinishi mumkin. Los-Anjeles prokuraturasi Dyorstning qatl etilishini talab qilmagan, chunki shtat o‘lim jazosiga moratoriy kiritgan, deya qayd etadi CNN.
2020-yil dekabr oyida Forbes jurnali Dyorst oilasining boyligini 8,1 milliard dollarga baholagan. 2006-yilda Robert Dyorst oilaviy biznesdagi o‘z ulushini qarindoshlariga 65 million dollarga sotgan. Shu tariqa Dyorstlar oilasi AQShning eng boy oilalari ro‘yxatida 47-o‘rinni egallagan.
2015-yil mart oyida Dyorst yaqin do‘sti Syuzan Bermanni o‘ldirganlikda gumon qilinib, hibsga olingandi, ayol 2000-yilda o‘z uyida boshidan o‘q yegan holatda topilgan. Ayol politsiya bilan Dyorstning rafiqasi Ketlinning g‘oyib bo‘lishi masalasida gaplashishni rejalashtirganidan ko‘p o‘tmay o‘ldirilgan. 1982-yilda millionerning rafiqasi sirli ravishda g‘oyib bo‘lgan, keyinchalik uning vafot etgani e’lon qilindi.
Bermanning o‘ldirib ketilishi haqidagi jinoyat ishi Dyorstning hayotiga bag‘ishlangan “La’nat” (The Jinx) hujjatli serial suratga olinganidan keyin ochildi. Jurnalist bilan bo‘lgan suhbatdan keyin millioner hojatxonaga kirib, o‘z-o‘zi bilan gaplasha boshlagan — bu vaqtda uning mikrofoni o‘chirilmagan bo‘lgan. “Jin ursin, o‘zi men nima qildim? Ularning hammasini o‘ldirdim, albatta”, — degan u shu jumladan. Suratga olish guruhi ushbu audioyozuvni hamda serial ustida ishlash chog‘ida to‘plangan boshqa dalillarni politsiyaga olib borgan.
2001-yilda Dyorst o‘zi bilan qo‘shni bo‘lib yashagan odamni o‘ldirgan. Ushbu qotillik uchun u sudlangan, ammo sud maslahatchilari uni o‘zini o‘zi mudofaa qilish zarurati doirasida harakat qilgan, deb topgan.
Izoh (0)