Buyuk Britaniya Konservativ partiyasining deputati Devid Emess saylovchilar bilan uchrashuv chog‘ida bir necha marta pichoqlandi. Hodisa Esseks grafligida Li-on-Si cherkovida yuz bergan, deb yozadi BBC News.
Esseks politsiyasining aytishicha, shifokorlar ikki soat davomida uning hayotini saqlab qolishga uringan, biroq u kasalxonada vafot etgan. Deputatning hamkasblari Twitter’da uning oila a’zolari va yaqinlariga ta’ziya bildirdi. Xususan, mamlakat bosh vazirining o‘rinbosari Dominik Raab Emessni “buyuk odam, yaxshi do‘st va ajoyib deputat” deb atadi.
“Butun qalbim bilan uning oilasiga va uni sevganlarga hamdardman”, — dedi Raab.
O‘z navbatida Britaniya bosh vaziri Boris Jonson hukmron partiya a’zosining o‘ldirilishidan hayratda qolganini aytdi.
“Menimcha, bu hammamiz uchun og‘ir zarba bo‘ldi. Bizning fikri-xayolimiz hozir uning yaqinlari, rafiqasi va bolalarida. Qolganini politsiyaga qo‘yib berib, ularga voqea sabablarini tekshirishga imkon berishimiz kerak”, — ta’kidladi Jonson. Bosh vazir hukumat yetakchi siyosatchilar uchun xavfsizlik choralarini kuchaytirishi kerakmi, degan savolga javob bermadi.
Emessning o‘limi munosabati bilan hukumat rahbari va moliya vazirining qarorgohlari joylashgan Dauning-stritda Britaniya bayroqlari tushirildi. Marhum deputatning ortidan uning rafiqasi va besh farzandi qolgan.
Qayd etilishicha, deputatni 25 yoshli yigit pichoqlagan, gumonlanuvchi pichoq bilan ushlangan. Hujumchining shaxsi va jinoyatning ehtimoliy sabablari hozircha oshkor qilinmagan. Shu bilan birga, politsiya qotilning sheriklari bo‘lmagan deb hisoblaydi.
Daily Telegraph Buyuk Britaniya xavfsizlik tuzilmalaridagi manbalariga tayanib, xabar berishicha gumonlanuvchi Somali fuqarosi. Guvohning aytishicha, hibsga olish paytida u xotirjam bo‘lgan va politsiyaga bo‘ysungan.
Devid Emess 1983-yildan buyon Britaniya parlamenti a’zosi edi. Mamlakat oldidagi xizmatlari uchun 2015-yilda unga ritsar-bakalavr unvoni berilgan. Shuningdek, Emess diniy katolik edi, bu uning siyosiy va ijtimoiy qarashlarida aks etgan. Taxminan, 40 yillik xizmatida u abortga qarshi kurash va hayvonlarni asrash kampaniyalari bilan tanilgan, deb yozadi BBC News.
Emessning o‘limidan besh yil avval Britaniyada yana bir parlament a’zosining hayotiga qasd qilingandi. 2016-yilda Leyboristlarning 41 yoshli deputati Jo Koks Brestoll shahrida saylovchilar bilan uchrashuvdan so‘ng o‘ldirilgan.
Izoh (0)