Британия парламенти депутати Дэвид Эмесс 15 октябрь куни кечқурун сайловчилар билан учрашув чоғида ўлдирилди. Унга пичоқ билан ҳамла қилишди. Учрашув Лондондан 65 км шарқдаги Эссекс графлигида жойлашган Ли-он-Си денгизбўйи шаҳрида методистлар черковидаги депутат қабулхонасида бўлиб ўтган. Буюк Британия бош вазири Борис Жонсон Эмессни «катта сиёсатдаги энг яхши, хушфеъл ва олижаноб одамлардан бири» деб атади. Жамоатчилик палатаси спикери Линдси Хойл ушбу қотиллик «бутун мамлакатдаги парламент аъзолари орасида шок ҳолатини қўзғатгани»ни айтди. Эмесс оилали бўлиб, беш нафар фарзанди бор эди.
Қотилликда гумонланиб, келиб чиқиши сомалилик бўлган 25 ёшли Британия фуқароси қўлга олинди. Ҳужум теракт деб аталди. Гумонланувчининг исми ошкор этилмаяпти, аммо полиция ҳужумга алоқадор бўлиши мумкин бўлган бошқа шахс қидирилмаётганини айтди. The Guardian полициядаги манбаларига таяниб ёзишича, гумонланувчи аввалроқ эҳтимолий «радикализация» нуқтаи назаридан махсус хизматлар диққат марказига тушган.
Эмесс парламентга биринчи марта 1983 йилда сайланган. У абортларга қаршилиги ва ҳайвонларни ҳимоя қилиши билан танилган. Консерватив партия аъзоси Эмесс 1983 йилда Буюк Британия ҳукумати тепасида Маргарет Тетчер бўлган вақтда Жамоатчилик палатаси депутатига айланган ва 38 йил давомида Британия парламентида ўз партиясининг анъанавийчилар қанотига тегишли бўлиб келди. Черковга мунтазам қатновчи католик сифатида у, хусусан, абортларни тақиқлаш тарафдори бўлган. Brexit ҳақидаги референдумдан аввал мамлакатнинг Евроиттифоқдан чиқишини қўллаб-қувватлаган. Айни вақтда у ҳайвонлар ҳуқуқларини ҳимоя қилиб, анъанавий овчиликнинг баъзи турларини тақиқлашни ёқлаб чиққан.
Эмесс — сўнгги беш йил ичида ўлдирилган британиялик иккинчи депутат. 1979 йилдан буён эса ўнинчиси. 2016 йилда Буюк Британиянинг Евроиттифоқдан чиқиши бўйича референдумга бир ҳафта қолганида ўта ўнгчи Томар Меир Лейбористлар партиясидан депутат Жо Коксни отиб ташлаган эди, у мамлакатни Евроиттифоқ таркибида сақлаб қолиш тарафдори эди. Унинг ўлимидан кейин Эмесс депутатлар учун хавфсизлик чораларини кучайтириш зарурлигини айтди ва бундай ҳужумлар «сиёсатчиларнинг халқ билан тўғридан-тўғри мулоқотидан иборат буюк британча анъанага зарба бераётгани»ни таъкидлади. 2010 йилда яна бир лейборист депутат Стефан Тиммс сайловчилар билан учрашувда икки марта пичоқ билан яраланган эди.
Сайловчилар билан очиқ учрашувлар Буюк Британияда парламент сиёсатининг муҳим таркиби ҳисобланиб, депутатларга сайловчилар билан доимий ва бевосита алоқада бўлиб туриш имкониятини беради. Бундай учрашувларда парламент аъзоларига махсус қўриқчилар ҳамроҳлик қилмайди, Эмесс билан боғлиқ вазиятда ҳам шундай бўлган: давлат томонидан жисмоний ҳимоя депутатлар учун фақат парламент биносида кафолатланган, бошқа ҳолатлар учун эса уларга махсус кўрсатмалардан ўтиш таклиф қилинади. 2019 йилги парламент кампанияси чоғида депутатларнинг кўпчилиги ижтимоий тармоқларда ва изоҳларда таҳдидлар кўпайганидан шикоят қилганди. Бу ҳақда Эмесснинг ўзи ҳам гапирган. Жамоатчилик палатаси спикери Линдси Хойл маълум қилишича, парламент аъзолари тез орада хавфсизлик чораларини кучайтириш масаласини муҳокама қилади.
Изоҳ (0)