15-oktabr kuni Afg‘onistonning Qandahor shahrida joylashgan shialar masjidida portlash sodir etildi. Hodisa qurbonlari soni 62 kishiga yetdi, deb yozadi Daily Sabah nashri.
Bakhtar axborot agentligi xabariga ko‘ra, yana kamida 70 kishi jarohatlangan. Guvohlarning aytishicha, teraktni to‘rt nafar xudkush sodir etgan. Ulardan ikki nafari masjidning old tarafidagi darvoza yonida o‘zini portlatgan, yana ikkitasi binoga kirib, ichkarida o‘zini portlatgan.
Bundan tashqari, juma namozi bo‘lgani sababli odatiy ravishda masjidda 500 nafargacha odam bo‘lgan. Hozircha portlash uchun hech kim javobgarlikni o‘z zimmasiga olmagan.
Bundan bir hafta oldin ham Afg‘onistonning Qunduz shahridagi shialar masjidida portlash yuz bergandi. O‘shanda Frans-Press agentligi manbalarga tayanib, kamida 50 kishi qurbon bo‘lgani va 140 kishi yaralanganini xabar qildi. Aamaj News hodisaga oid videomateriallar, shuningdek, guvohlarning ko‘rsatmalariga tayanib, portlashda 100 ga yaqin odam halok bo‘lgani haqida yozgan.
Undan avval esa Kobuldagi masjid yaqinida portlash sodir bo‘lgan va buning uchun javobgarlikni IShID o‘z zimmasiga olgan. Bundan tashqari, 6-oktabr kuni kechasi Xost viloyatidagi diniy maktab tashqarisida yana bir hujum uyushtirilgan, 1-oktabr kuni esa Parvon viloyatining shimolida teraktlar sodir etilgani xabar qilingan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)