Qirg‘iziston prezidenti Sadir Japarov “Qirg‘iziston Respublikasi Vazirlar Mahkamasi to‘g‘risida”gi qonunga imzo chekdi va o‘z vakolatlarini sezilarli darajada kengaytirdi. Bu haqda davlat rahbari matbuot xizmati xabar berdi.
Hujjatga ko‘ra, Japarov o‘z tashabbusi bilan bosh vazir va Vazirlar Mahkamasi a’zolarini iste’foga chiqarishi mumkin. Bundan tashqari, qonunda hukumat a’zosining lavozimidan ozod qilinishiga sabab bo‘ladigan asoslar ko‘zda tutilgan.
Shuningdek, Vazirlar Mahkamasi a’zolari uchun ba’zi cheklovlar o‘rnatilgan. Xususan, ular tadbirkorlik faoliyati bilan shug‘ullanishi va saylovoldi kampaniyasi davrida ma’muriy resurslardan foydalanishi taqiqlanadi.
Avvalroq Qirg‘iziston Konstitutsiyaviy kengash rahbari Bekbosun Borubashev hukumat boshqaruvning parlament-prezidentlik shaklidan prezidentlik shakliga o‘tmoqchi ekanini, shuning uchun prezident ko‘proq mas’uliyatni o‘z zimmasiga olishi kerakligini aytgandi. Uning ta’kidlashicha, loyihani ishlab chiquvchilar hukumat prezident apparatining qarorlari uchun javobgar bo‘ladigan holatlarni tuzatmoqchi bo‘lgan.
Japarovning ta’kidlashicha, avval Qirg‘izistonda amal qilgan parlament-prezidentlik boshqaruv shakli ommaviy tartibsizliklarning asosiy sababi bo‘lgan va 2020-yil oktabr oyida respublikada hokimiyat almashishiga olib kelgan. May oyida davlat rahbari yangi konstitutsiyani imzoladi.
Yangi asosiy qonun boshqaruvning prezidentlik shakliga o‘tishini va respublikada hukumat tizimini tashkil etish bilan bog‘liq boshqa bir qator o‘zgarishlarni, shu jumladan parlament a’zolari sonini hozirgi 120 kishidan 90 kishigacha qisqartirishni nazarda tutadi.
Izoh (0)