Xitoy shimolidagi Shansi provinsiyasida bir haftadan buyon tinmayotgan kuchli yomg‘ir keng ko‘lamli suv toshqinlarini keltirib chiqardi. Oqibatda mintaqadagi 1 million 760 ming kishini evakuatsiya qilishga to‘g‘ri keldi, deb yozadi BBC Xitoy meteorologik xizmatiga tayanib.
Ta’kidlanishicha, tabiiy ofat provinsiyaning 70 dan ortiq tuman va shaharlaridagi uylarni vayron qilgan va ko‘chkilarga sabab bo‘lgan. Shu bilan birga, davom etayotgan yomg‘irlar qidiruv-qutqaruv ishlarini murakkablashtirmoqda.
Bu holatning yana bir ayanchli tomoni shundaki, provinsiyada suv toshqini xavfi ostida qolgan ko‘plab tarixiy obidalar mavjud.
Hozircha tabiiy ofat hududida sodir bo‘lgan ko‘chki natijasida halok bo‘lgan to‘rt nafar politsiyachi haqida ma’lum qilingan. Boshqa qurbonlar haqida ma’lumot yo‘q. Dastlabki ma’lumotlarga ko‘ra, toshqinlar oqibatida mahalliy aholining 17 ming uyi vayron bo‘lgan. Prognozlarga ko‘ra, hozirgi yomon ob-havo uch oy oldin Xenan provinsiyasida 300 dan ortiq odamning o‘limiga olib kelgan toshqinlardan ham yomonroq bo‘ladi.
O‘tgan hafta Xitoy shimolida kuchli yomg‘ir yog‘ishni boshlagan. Bu vaqt mobaynida Shansi provinsiyasi poytaxti Tayyuanda o‘rtacha yog‘ingarchilik mintaqada 1981-yildan 2010-yilgacha qayd etilgan oktabr oyidagi o‘rtacha yog‘ingarchilikdan 7 baravar yuqori bo‘ldi.
Eslatib o‘tamiz, Londonda 6-oktabrga o‘tar kechasi kuchli yomg‘ir yog‘ib, oqibatda suv toshqini yuz bergan va bir nechta metro liniyalari yopilgandi. Shuningdek, o‘tgan hafta boshida Italiyada ob-havo keskin yomonlashib, kuchli yomg‘ir, momaqaldiroq va qattiq shamol boshlangan. Mamlakatning Fuqarolik mudofaa xizmati qaroriga binoan, uchta shimoliy viloyat — Liguriya, Lombardiya va Pyemontning bir qator tumanlarida meteorologik xavfning “qizil” (eng yomon) darajasi e’lon qilindi.
Avvalroq Ummon va Eronga kuchli “Shohin” tropik sikloni urilib, 13 kishi tabiiy ofat qurboniga aylangani haqida xabar berilgandi. Qayd etilishicha, Ummonning shimoliy qirg‘og‘ida keng ko‘lamli suv toshqini sodir bo‘lgan. Kuchli yomg‘ir yog‘ib, shamol tezligi soatiga 150 kilometrgacha yetgan.
Izoh (0)