KXDR hukumati fuqarolarning yashash sharoitlarini yaxshilashni ustuvor vazifalaridan biriga aylantirishi kerak. Mamlakat rahbari Kim Chen In Koreya Mehnat partiyasi tuzilganining 76 yilligi munosabati bilan qilgan chiqishida shunday bayonot berdi, deb yozadi “TASS”.
Davlat rahbari partiya yanvar oyida bo‘lib o‘tgan qurultoyda belgilangan xalq xo‘jaligini rivojlantirishning besh yillik rejasini samarali ilgari surishga qat’iy qaror qilganini aytib, uni fuqarolarni oziq-ovqat va uy-joy bilan ta’minlash muammolarini iloji boricha tezroq hal qilishga undadi. U o‘z nutqida, shuningdek, partiya qurilishining so‘nggi o‘n yil ichidagi asosiy bosqichlari haqida gapirdi.
Kim Chen In KXDRning Janubiy Koreya va AQSh bilan munosabatlarini tilga olmadi. U 2011-yil oxirida hokimiyat tepasiga kelganidan beri birinchi marta Mehnat partiyasi tashkil topganining yubileyi munosabati bilan ma’ruza qildi.
10-oktabr kuni mamlakatda hukmron partiya tashkil etilganiga 76 yil to‘ldi. Bu kun harbiy parad va kuchlarni ko‘z-ko‘z qiladigan boshqa namoyishlarsiz o‘tkazildi. Gazetalarda partiya va Kim Chen Inning mamlakat va xalq oldidagi xizmatlariga bag‘ishlangan bir qancha maqolalar chop etilgan. Masalan, markaziy “Nodon Sinmun” tahririyati fuqarolarni rahbarni qo‘llab-quvvatlash uchun safarbarlikka chaqirib, Kim Chen Inning iqtisodiy muammolarni hal qilishdagi harakatlari haqida maqolalar chiqargan.
Izoh (0)