Қирғизистон президенти Садир Жапаров «Қирғизистон Республикаси Вазирлар Маҳкамаси тўғрисида»ги қонунга имзо чекди ва ўз ваколатларини сезиларли даражада кенгайтирди. Бу ҳақда давлат раҳбари матбуот хизмати хабар берди.
Ҳужжатга кўра, Жапаров ўз ташаббуси билан бош вазир ва Вазирлар Маҳкамаси аъзоларини истеъфога чиқариши мумкин. Бундан ташқари, қонунда ҳукумат аъзосининг лавозимидан озод қилинишига сабаб бўладиган асослар кўзда тутилган.
Шунингдек, Вазирлар Маҳкамаси аъзолари учун баъзи чекловлар ўрнатилган. Хусусан, улар тадбиркорлик фаолияти билан шуғулланиши ва сайловолди кампанияси даврида маъмурий ресурслардан фойдаланиши тақиқланади.
Аввалроқ Қирғизистон Конституциявий кенгаш раҳбари Бекбосун Борубашев ҳукумат бошқарувнинг парламент-президентлик шаклидан президентлик шаклига ўтмоқчи эканини, шунинг учун президент кўпроқ масъулиятни ўз зиммасига олиши кераклигини айтганди. Унинг таъкидлашича, лойиҳани ишлаб чиқувчилар ҳукумат президент аппаратининг қарорлари учун жавобгар бўладиган ҳолатларни тузатмоқчи бўлган.
Жапаровнинг таъкидлашича, аввал Қирғизистонда амал қилган парламент-президентлик бошқарув шакли оммавий тартибсизликларнинг асосий сабаби бўлган ва 2020 йил октябрь ойида республикада ҳокимият алмашишига олиб келган. Май ойида давлат раҳбари янги конституцияни имзолади.
Янги асосий қонун бошқарувнинг президентлик шаклига ўтишини ва республикада ҳукумат тизимини ташкил этиш билан боғлиқ бошқа бир қатор ўзгаришларни, шу жумладан парламент аъзолари сонини ҳозирги 120 кишидан 90 кишигача қисқартиришни назарда тутади.
Изоҳ (0)