Chexiyada kasalxonada yotgan prezidentni vakolatlaridan mahrum qilish masalasi ko‘rib chiqiladi

Chexiya Senatining Konstitutsiyaviy komissiyasi 12-oktabr kuni respublika rahbari Milosh Zemandan prezidentlik vakolatlarining bir qismini olib tashlash imkoniyatini ko‘rib chiqadi. Bu qarorga Zemanning qayta-qayta kasalxonaga yotqizilishi sabab bo‘lgan, hozir ham u Pragadagi Markaziy harbiy kasalxona reanimatsiyasida yotibdi.

Parlament yuqori palatasining fikricha, agar davlat rahbarining kasalligi uzoq davom etsa va u 8—9-oktabrda bo‘lib o‘tgan Deputatlar palatasiga saylovdan so‘ng partiya rahbarlari bilan mamlakatning yangi hukumatini tuzish to‘g‘risida muzokara o‘tkaza olmasa, ushbu variantni hisobga olish kerak.

Prezidentning vakolatlarini qisqartirish masalasi Senat rahbari Milosh Vistrchil tomonidan ilgari surilgan. U Chexiya Respublikasi prezidenti vakolatlarining bajarilishini ta’minlash masalasini ko‘rib chiqish uchun 19-oktabrda Konstitutsiyaviy komissiyani chaqirishga qaror qildi.

Shu bilan birga, Vistrchilning ta’kidlashicha, u prezidentning sog‘ayib ketishini istaydi, lekin “mamlakat aniq tartib-qoidalarga muhtoj bo‘lib turibdi, davlat rahbarining ehtimoliy asoratlari tufayli konstitutsiyaviy institutlarning falajlanishiga yo‘l qo‘yib bo‘lmaydi”.

Zeman oyoq nevropatiyasidan aziyat chekadi, shu sababli u bu yil nogironlar aravachasida harakatlanishni boshlagan. U, shuningdek, eshitish qobiliyati yomonlashgani va qon bosimi pastligidan shikoyat qilgan. Bundan tashqari, Zeman uzoq vaqtdan buyon qandli diabet bilan kurashadi. O‘tgan yili Chexiya prezidenti yiqilib, qo‘lini sindirib olgan.

Chexiyada konstitutsiya, agar deputatlar palatasi va Senat davlat rahbari jiddiy sabablarga ko‘ra o‘z vazifalarini bajara olmasligi to‘g‘risida qaror qabul qilsa, prezidentni vakolatlaridan mahrum qilishga ruxsat beradi.

77 yoshli Milosh Zeman 10-oktabr kuni Pragadagi Markaziy harbiy kasalxonaga yotqizildi.  Zemanni davolovchi shifokor Miroslav Zaboralning ma’lum qilishicha, bunga davlat rahbaridagi surunkali kasallik bilan bog‘liq asoratlar sabab bo‘lgan. U bemorining talabiga binoan tashxisning nomini oshkor qilmadi.

Chexiyaning Novinky nashri manbalarga tayangan holda, prezidentning kasalxonaga yotqizilishiga sabab buyrak muammosi bo‘lsa kerak, deya yozdi.

Bundan avval Zeman sentabr oyida sakkiz kun Markaziy harbiy kasalxonaga yotqizilgan edi. Praga qal’asi buni rejalashtirilgan muolaja deb aytdi. Zeman 2013-yilda Chexiya Respublikasi prezidentiga aylangan. 2018- yilda u ikkinchi besh yillik muddatga qayta saylangan.