Chexiya prezidenti Milosh Zeman Pragadagi Markaziy harbiy kasalxonaga yotqizildi. Ushbu ma’lumotni Zemanni davolovchi shifokor Miroslav Zaboral Chexiyaning Blesk telekanali efirida tasdiqladi.

Foto: Global Look Press

77 yoshli Zemandagi surunkali kasallik bilan bog‘liq asoratlar kasalxonaga yotqizishga sabab bo‘ldi, deydi Zaboral. U tashxisning nomini aytolmasligini, chunki buning uchun prezident roziligini olmaganini qo‘shimcha qildi.

Zaboral xabariga ko‘ra, Zeman 10-oktabr kuni tushdan keyin uning tavsiyasi bilan kasalxonaga yotqizilgan. “Biz aniq tashxisni bilamiz va kerakli muolajalarni ko‘rsata olamiz. Hozirda bemor mutaxassislar nazorati ostida reanimatsiyada”, — deya qo‘shimcha qildi shifokor.

Chexiyaning Novinky nashri manbalarga tayangan holda, prezidentning kasalxonaga yotqizilishiga sabab buyrak muammosi bo‘lsa kerak, deya yozdi.

Novinky xabariga ko‘ra, Zeman bosh vazir Andrey Babish bilan uchrashuvidan ko‘p o‘tmay kasalxonaga yotqizilgan. Avvalroq Babishning partiyasi parlament saylovlarida “Birgalikda” muxolifat koalitsiyasiga yutqazgan edi.

Saylov oldidan Zeman Babishning harakatini qo‘llab-quvvatlashini bildirgandi. O‘shanda u parlament saylovlaridan keyin hukumatni tuzishni saylov koalitsiyalaridan birining rahbariga emas, balki eng ko‘p ovoz olgan partiya raisiga ishonib topshirishini aytgan. Saylovlar natijasida Babish harakati 27,18 foiz, “Birgalikda” koalitsiyasi esa 27,74 foiz ovoz to‘pladi. Natijalar e’lon qilingandan so‘ng, Babish “Birgalikda” yetakchisi Petr Fialani g‘alaba bilan tabrikladi.

Zeman oxirgi marta sentabr oyida sakkiz kun Markaziy harbiy kasalxonaga yotqizilgan edi. Praga qal’asi buni rejalashtirilgan muolaja deb aytdi. Zeman 2013-yilda Chexiya Respublikasi prezidentiga aylangan. 2018- yilda u ikkinchi besh yillik muddatga qayta saylangan. Siyosatchi diabet va oyoqlarning nevropatiyasi bilan kasallangan, u nogironlar aravachasida harakatlanadi.