Nyu-Yorkdagi Belarus bosh konsulxonasi 21-oktabrdan o‘z ishini to‘xtatadi. Bu haqda bosh konsulxona saytiga tayanib, “Interfaks” xabar berdi.
“Sizga shuni ma’lum qilamizki, Amerika tomonining talabiga binoan Belarusning Nyu-Yorkdagi bosh konsulxonasi 2021-yil 21-oktabrda o‘z faoliyatini to‘xtatadi”, — deyiladi xabarda.
Qayd etilishicha, bosh konsulxona konsullik okrugi hududida (jumladan, Kanadada) yashovchi Belarus fuqarolari muassasa yopilganidan so‘ng, konsullik harakatlari uchun Vashingtondagi Belarus elchixonasiga ariza berishi mumkin.
Xabarga ko‘ra, 15-oktabrgacha bosh konsulxonada shaxsiy qabul uchun ilgari ro‘yxatdan o‘tgan belarusliklar konsullik harakatlari uchun hujjatlarini topshirishi mumkin. 15-oktabrdan keyin bosh konsulxona idorasiga kirishga ruxsat berilmaydi. 8-oktabrdan telefon orqali konsultatsiya berish to‘xtatilgan.
Sentabr oyi boshida Belarus tashqi ishlar vaziri Vladimir Makey Minsk AQShdagi elchisi etib kimni tayinlash to‘g‘risida qaror qabul qilganini, lekin hozirgi sharoitda uni AQShga yuborish uchun hech qanday sabab ko‘rmayotganini aytgan.
O‘z navbatida AQShning Minskdagi elchixonasi avgust oyi oxirida respublikadagi diplomatik missiyasini qisqartirganini e’lon qildi.
Minskka qarshi Amerika sanksiyalarining qayta tiklanishi fonida Belarus Tashqi ishlar vazirligi AQShga Minskdagi elchixonasi xodimlari sonini 1-sentabrga qadar 5 kishigacha kamaytirishni taklif qilgandi. Shuningdek, Belarus Juli Fisherni AQShning Belarusdagi elchisi etib tayinlashga ilgari berilgan roziligini qaytarib olgan.
Belarusdagi AQSh elchisi lavozimi 2008-yildan beri bo‘sh turibdi. 2020-yil dekabr oyida AQSh Davlat departamenti unga Fisherning nomzodini ma’qulladi, lekin u Minskka kelmagan. Elchining akkreditatsiyasi tugallanmagan, Fisherning Belarus bilan hech qanday rasmiy aloqasi yo‘q, degan edi o‘sha paytda Minskdagi rasmiylar.
Fisher Belarusdan tashqarida mamlakat muxolifati vakillari bilan aloqalarni saqlab turibdi.
2021-yil iyun oyida AQSh Belarusga qarshi sanksiyalarni yanada kengaytirgan, 16 nafar jismoniy shaxs, 5 ta idora va tashkilotga nisbatan cheklovlar joriy qilingandi. Keyinchalik Yevropa Ittifoqi ham Belarusga qarshi yangi sanksiyalar qo‘llagan. Minsk mazkur cheklovlarni iqtisodiy urushga qiyoslagan.
Izoh (0)