Чехияда касалхонада ётган президентни ваколатларидан маҳрум қилиш масаласи кўриб чиқилади

Чехия Сенатининг Конституциявий комиссияси 12 октябрь куни республика раҳбари Милош Земандан президентлик ваколатларининг бир қисмини олиб ташлаш имкониятини кўриб чиқади. Бу қарорга Земаннинг қайта-қайта касалхонага ётқизилиши сабаб бўлган, ҳозир ҳам у Прагадаги Марказий ҳарбий касалхона реанимациясида ётибди.

Парламент юқори палатасининг фикрича, агар давлат раҳбарининг касаллиги узоқ давом этса ва у 8—9 октябрда бўлиб ўтган Депутатлар палатасига сайловдан сўнг партия раҳбарлари билан мамлакатнинг янги ҳукуматини тузиш тўғрисида музокара ўтказа олмаса, ушбу вариантни ҳисобга олиш керак.

Президентнинг ваколатларини қисқартириш масаласи Сенат раҳбари Милош Вистрчил томонидан илгари сурилган. У Чехия Республикаси президенти ваколатларининг бажарилишини таъминлаш масаласини кўриб чиқиш учун 19 октябрда Конституциявий комиссияни чақиришга қарор қилди.

Шу билан бирга, Вистрчилнинг таъкидлашича, у президентнинг соғайиб кетишини истайди, лекин «мамлакат аниқ тартиб-қоидаларга муҳтож бўлиб турибди, давлат раҳбарининг эҳтимолий асоратлари туфайли конституциявий институтларнинг фалажланишига йўл қўйиб бўлмайди».

Земан оёқ невропатиясидан азият чекади, шу сабабли у бу йил ногиронлар аравачасида ҳаракатланишни бошлаган. У, шунингдек, эшитиш қобилияти ёмонлашгани ва қон босими пастлигидан шикоят қилган. Бундан ташқари, Земан узоқ вақтдан буён қандли диабет билан курашади. Ўтган йили Чехия президенти йиқилиб, қўлини синдириб олган.

Чехияда конституция, агар депутатлар палатаси ва Сенат давлат раҳбари жиддий сабабларга кўра ўз вазифаларини бажара олмаслиги тўғрисида қарор қабул қилса, президентни ваколатларидан маҳрум қилишга рухсат беради.

77 ёшли Милош Земан 10 октябрь куни Прагадаги Марказий ҳарбий касалхонага ётқизилди.  Земанни даволовчи шифокор Мирослав Заборалнинг маълум қилишича, бунга давлат раҳбаридаги сурункали касаллик билан боғлиқ асоратлар сабаб бўлган. У беморининг талабига биноан ташхиснинг номини ошкор қилмади.

Чехиянинг Novinky нашри манбаларга таянган ҳолда, президентнинг касалхонага ётқизилишига сабаб буйрак муаммоси бўлса керак, дея ёзди.

Бундан аввал Земан сентябрь ойида саккиз кун Марказий ҳарбий касалхонага ётқизилган эди. Прага қалъаси буни режалаштирилган муолажа деб айтди. Земан 2013 йилда Чехия Республикаси президентига айланган. 2018- йилда у иккинчи беш йиллик муддатга қайта сайланган.