Chexiya prezidenti Vrbetitsadagi portlashlar sababini kamomadni yashirishga urinish deb atadi. Bosh vazir voqeada faqat Rossiyadan gumon qilinayotganini aytdi
Rossiya maxsus xizmatlarining qo‘li bor, deya gumon qilinayotgan 2014-yilda Chexiyaning Vrbetitsa qishlog‘idagi o‘q-dorilar omborlarida sodir bo‘lgan portlashlarning sababi kamomadni yashirishga urinish bo‘lgan bo‘lishi mumkin. Bu haqda Chexiya prezidenti Milosh Zeman o‘z intervyusida aytib o‘tdi, deb yozadi Meduza.
Davlat rahbarining so‘zlariga ko‘ra, ushbu versiya haqida unga Chexiya adliya vaziri Mariya Benesheva aytgan. Zeman Vrbetitsadagi voqea sababining dastlabki versiyasi o‘q-dorilarni saqlashda beparvolikka yo‘l qo‘yilishi ekanini eslatib o‘tdi. Prezident voqeaga oid uchala taxminning hech biriga tarafdorlik qilmayotganini aytdi.
Chexiya bosh vaziri Andrey Babish Zemanning ushbu bayonotiga quyidagicha izoh berdi: “Men prezidentga politsiya faqat bitta versiya ustida tekshiruv olib borayotganini aytgandim. 2014-yildan beri o‘tkazilgan tekshiruv jarayonida undan ko‘proq taxminlarga duch kelingan bo‘lishi mumkin. Ammo prezident nima uchun versiyalar ko‘proq ekanini ta’kidlayotganini izohlab berolmayman”.
Zemanning so‘zlarini uning o‘zi manba sifatida keltirgan Mariya Benesheva ham rad etdi. “Menda politsiya Rossiya Qurolli Kuchlari Bosh razvedka boshqarmasining aralashuvidan boshqa versiya bilan ishlayotgani haqida hech qanday ma’lumot yo‘q”, — dedi u jurnalistlarga.
Avvalroq Chexiya Vrbetitsadagi portlashlar uchun Rossiyadan 47 million dollar tovon puli talab qilmoqchiligi haqida xabar berilgan.
Shuningdek, Chexiya bosh vaziri Andrey Babish Yevroittifoq mamlakatlari rahbariyatini Vrbetitsa qishlog‘idagi portlashlar haqidagi ish bo‘yicha Chexiya hukumati bilan birdamlik ramzi sifatida hech bo‘lmaganda bir nafardan Rossiya diplomatlarini chiqarib yuborishga chaqirgan edi.
Chexiya Rossiyani 2014-yil 17-aprelda Moraviyaning janubi-g‘arbiy qismidagi o‘q-dorilar omborida sodir bo‘lgan portlashlarga aloqadorlikda ayblaganidan keyin ular o‘rtasidagi keng ko‘lamli siyosiy-diplomatik nizo paydo bo‘ldi. Shundan so‘ng Praga qiymati 6 milliard yevro bo‘lgan “Dukovani” atom elektr stansiyasining yangi energiya blokini qurish bo‘yicha tenderda ishtirok etish uchun “Rosatom” davlat korporatsiyasining nomzodlar safidan chiqarilishini e’lon qildi.
Buning ortidan Chexiya 18 nafar rossiyalik diplomatni mamlakatdan chiqarib yubordi. Bunga javoban Moskva ham 20 nafar chexiyalik diplomatni mamlakatdan chiqarib yubordi.
