AQSh prezidenti Jo Bayden 2022-moliya yilida (1-oktabrdan boshlandi) mamlakatga qochqinlarni qabul qilish kvotasini ikki baravar oshirdi. Endi AQSh 62,5 ming emas, 125 ming kishini qabul qiladi. Bu haqda 8-oktabr kuni Oq uy tarqatgan bayonotga tayanib “Korrespondent.net” xabar berdi.
“2022-moliyaviy yilda Qo‘shma Shtatlarga 125 minggacha qochqinning qabul qilinishi insonparvarlik nuqtayi nazaridan kelib chiqadi yoki milliy manfaatlarga asoslanadi”, — deb ta’kidladi Amerika rahbari.
Shu bilan birga, Vashington ma’muriyati Yevropa va Markaziy Osiyo mamlakatlaridan 10 ming qochqinni qabul qilmoqchi. Avvalroq hukumat qochqinlarni qabul qilish kvotasini oshirish niyati haqida Kongressni ogohlantirgandi.
May oyida Bayden o‘tgan 2021-moliyaviy yilda qochqinlarni qabul qilish chegarasini 62,5 ming kishiga oshirgandi, undan avvalgi prezident Donald Tramp davrida ushbu kvota 1980-yildan buyon eng kam — 15 ming kishi uchun belgilangandi. Fevral oyida Bayden chet eldan qochqinlarni qabul qilish kvotasini 2022-moliya yilida 125 ming kishiga oshirish niyatida ekanligini ma’lum qildi.
Izoh (0)