Gruziyaning Batumi shahrida qulab tushgan 5 qavatli turar joy binosi vayronalari ostidan besh kishining jasadi topildi. Qidiruv-qutqaruv ishlari davom etmoqda, deb xabar berdi Gruziya Ichki ishlar vazirligi.
“Rustavi 2” telekanali ma’lumotlariga ko‘ra, qurbonlarning ikki nafari bolalardir. Avvalroq vayronalar ostida uch nafar voyaga yetmagan qolib ketgan bo‘lishi mumkinligi haqida xabar berilgandi. Bir necha kishi qutqarilgan.
8-oktabr kuni Batumi markazidagi besh qavatli binoning bir qismi qulab tushgandi. Guvohlarning so‘zlariga ko‘ra, bino qulashidan oldin gaz o‘chib qolgan.
Hodisa joyida olib borilayotgan qutqaruv operatsiyasiga 300 ga yaqin odam jalb qilingan. Fojia sabablari hozircha noma’lum.
Eslatib o‘tamiz, Ispaniyaning Peniskola munitsipalitetida uch qavatli turar joy binosi qulab tushgandi. Bino qulashining sabablari haqida ma’lumot berilmagan. U yaqinda qurilgan. El Mundo xabariga ko‘ra, favqulodda holat mintaqada bir necha kun davom etgan kuchli yomg‘ir tufayli yuzaga kelgan bo‘lishi mumkin.
Izoh (0)