AQSh prezidenti Jo Bayden rossiyalik va filippinlik jurnalistlar Dmitriy Muratov hamda Mariya Ressani tinchlik bo‘yicha 2021-yilgi Nobel mukofotiga sazovor bo‘lgani bilan tabrikladi. Bu haqda Oq uy bayonotiga tayanib “Interfaks” xabar berdi.
“Filippinlik Mariya Ressa va rossiyalik Dmitriy Muratovni bu yilgi tinchlik bo‘yicha Nobel mukofoti laureatlari deb topilib, munosib sharafga sazovor bo‘lgani bilan tabriklayman. Butun dunyodagi ko‘plab jurnalistlar singari, Ressa va Muratov ham tinimsiz va qo‘rqmasdan faktlarni kuzatadi”,— deydi u.
AQSh prezidentining qo‘shimcha qilishicha, mukofotga sazovor bo‘lgan jurnalistlar hokimiyatni suiiste’mol qilish holatlarni cheklash va korrupsiyani fosh etish ustida ishlagan.
“Ressa, Muratov va ular kabi butun dunyodagi jurnalistlar haqiqat g‘oyasi uchun global kurashning boshida turibdi”, — deya qo‘shimcha qildi Bayden.
Eslatib o‘tamiz, 8-oktabr kuni tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
O‘tgan yili tinchlik bo‘yicha Nobel mukofoti ochlikka qarshi kurashuvchi eng yirik gumanitar tashkilot bo‘lgan Jahon oziq-ovqat dasturiga berilgan edi.
Tinchlik mukofoti — Nobel mukofotlari orasida sovrindorlar Stokgolmda emas, Osloda e’lon qilinadigan va taqdirlanadigan yagonasi.
11-oktabr kuni iqtisodiyot bo‘yicha mukofot sovrindorlari e’lon qilinganidan keyin Nobel haftaligi yakunlanadi. Avvalroq fiziologiya va tibbiyot, fizika, kimyo, adabiyot yo‘nalishlari bo‘yicha 2021-yilgi Nobel mukofotining sohiblari aniqlangandi.
Izoh (0)