AQShda koronavirusning delta shtammi bilan kasallangan bolalar orasida multisistemali yallig‘lanish sindromiga chalinish holatlari ko‘paydi. Kasallik tafsilotlari AQSh mutaxassislari tomonidan ma’lum qilingan, deb yozadi ABC News.
Multisistemali yallig‘lanish sindromi (MIS-C) — bu tananing turli qismlari, shu jumladan, yurak, o‘pka, buyrak, miya va teriga ta’sir qiladigan kamdan kam uchraydigan kasallik. Shuningdek, ko‘zlar yoki oshqozon-ichak yo‘lining organlari yallig‘lanadi.
MIS-C odatda, COVID-19 ga chalingandan to‘rt-olti hafta o‘tgach paydo bo‘ladi. AQShda kasallanishning o‘sishi yozda koronavirusining delta shtammi keng tarqalishidan so‘ng sodir bo‘ldi.
Shifokorlarning ta’kidlashicha, sindrom bolalarda jiddiy kasalliklar keltirib chiqarishi va o‘limga olib kelishi mumkin. CDC ma’lumotlariga ko‘ra, ayni paytda ushbu kasalikka tashxis qo‘yilgan bolalarning ko‘pchiligi tibbiy yordam bilan tuzalib ketmoqda.
AQShda MIS-C bilan 5217 ta kasallanish holati hamda sindrom tufayli 46 ta o‘lim holati tasdiqlangan. Shu bilan birga, kasallikka chalinish holatlarining 61 foizga yaqini lotinamerikalik yoki qora tanli bolalarda qayd etilgan. Qolaversa, bu kasallikdan 6 yoshdan 11 yoshgacha bo‘lgan bolalar ko‘proq zarar ko‘rmoqda.
AQShda 5,9 million bolada koronavirus tasdiqlangan bo‘lsa, MIS-C infeksiyasiga chalinganlar soni atigi 0,0009 foizni tashkil qiladi. Biroq iyul—avgust oylarida MIS-C bilan kasallanishning o‘rtacha soni deyarli ikki baravar ko‘paydi. Nashrning xabar berishicha, Qo‘shma Shtatlardagi ko‘plab bolalar shifoxonalari so‘nggi oylarda MIS-C holatlarining ortishi haqida xabar bergan.
Eslatib o‘tamiz, iyun oyida Hindistonda COVID-19 dan tuzalgan bolalarda multisistemali yallig‘lanish sindromiga chalinish bo‘yicha 2000 dan ortiq holat qayd etilgandi.
Izoh (0)