Downdetector servisida 8-oktabr kuni kechqurun Facebook, Instagram va WhatsApp foydalanuvchilaridan tushayotgan shikoyatlar soni keskin ortdi. Facebook foydalanuvchilarining ko‘pchiligi sayt yoki dastur bilan bog‘liq muammolar, yana bir qismi esa tizimga kirishdagi qiyinchiliklar haqida shikoyat qilgan.
Facebook ma’lum qilishicha, kompaniya bir qator foydalanuvchilar ijtimoiy tarmoq bilan bog‘liq muammolarga duch kelganidan xabardor. “Biz hammasini imkon qadar tezroq normal holatga qaytarish uchun ishlayapmiz, noqulayliklar uchun esa uzr so‘raymiz”, — deya qo‘shimcha qildi kompaniya.
Instagram foydalanuvchilari serverga ulanishda muammolar borligini, WhatsApp mijozlari esa xabar yuborishda qiyinchiliklar borligini aytgan. Ularning barchasi dasturlardagi uzilishlardan shikoyat qilgan.
Dasturdagi uzilishlar butun dunyoda qayd etildi, AQSh, Fransiya, Buyuk Britaniya, Germaniya, Braziliyadan hisobotlar berilgan.
Bu ijtimoiy tarmoqlar va messenjer ishidagi bir hafta ichida ikkinchi uzilish. Avval Facebook, WhatsApp, Instagram va bir qator Google servislari 4-oktabr kuni bir necha soat ishlamay qolgandi. Downdetector portali buni tarixdagi eng yirik uzilishlar deb atadi. Servis ma’lumotlariga ko‘ra, muammo haqida unga dunyo bo‘ylab 10,6 milliondan ortiq xabar kelib tushgan.
Izoh (0)