“Nurafshon” (sobiq “Buxoro”) klubi bosh direktori lavozimida faoliyat olib borgan Usmon Toshev O‘FA terma jamoalar bo‘limi boshlig‘i lavozimiga tayinlandi. Bu haqda O‘FA matbuot xizmati ma’lum qildi.
Usmon Toshev shu vaqtga qadar O‘zbekiston terma jamoasida yordamchi murabbiy, O‘zbekiston U-16 terma jamoasi bosh murabbiyi, Tojikiston terma jamoasi bosh murabbiyi lavozimlarida faoliyat olib borgan. “Daryo” quyida mutaxassisning faoliyati borasida batafsil ma’lumot beradi.
Usmon Toshev 2000-yilda “Buxoro” jamoasida murabbiylik faoliyatini boshlaydi va u yerda 2008-yilga qadar faoliyat olib boradi.
2005-yilda murabbiylik bo‘yicha PRO litsenziyasini qo‘lga kiritadi. 2006-yilda qisqa muddat O‘zbekiston terma jamoasi bosh murabbiyi Valeriy Nepomnyashchiyning yordamchisi bo‘lib ishlaydi.
2008-yilda esa Qarshining “Nasaf” jamoasini vaqtincha boshqargan. Mavsum yakunida jamoa chempionatni 9-o‘rin bilan yakunladi. 2009-yilda esa “Sho‘rtan” jamoasida ishlagan. “Sho‘rtan” 8-o‘rinni egallagan. 2009—2011-yillar mobaynida Toshkentning “Spartak” jamoasi ustozi sifatida faoliyat olib boradi.
2011-yilda “Nasaf”da menejer va sport direktori vazifasiga tayinlanadi. O‘sha mavsumda “Nasaf” OFK Kubogida chempionlikni qo‘lga kiritgandi. O‘zbekiston Kubogida esa finalga qadar yetib borgan qarshiliklar “Paxtakor” jamoasiga 1:3 hisobida mag‘lub bo‘ldi. Ichki chempionatda esa 53 ochko jamg‘arib, ikkinchi o‘rinni egalladi. 2012-yilning may oyidan boshlab ushbu jamoa bosh murabbiyiga aylanadi. Toshev qo‘l ostida jamoa 2012-yilda 4-o‘rin bilan yakunlagan.
2014-2015-yillar mobaynida Afg‘onistonning “De Maivand Atalan” jamoasida, 2017-yilda esa “Andijon” jamoasida ishlagan.
2018-yilda 16 yoshgacha bo‘lgan O‘zbekiston yoshlar terma jamoasini qisqa muddat boshqaradi va CAFA musobaqasi chempioniga aylandi. Uning shogirdlari finalda Tojikiston U-16 terma jamoasi ustidan 3:1 hisobida g‘alaba qozonadi.
2018-yilning ikkinchi yarmida esa Afg‘onistonning “Tufan Herirud” jamoasida ish boshlaydi. O‘sha yilning o‘zida Toshev jamoasi Afg‘oniston Premyer Ligasida chempionlikni qo‘lga kiritadi.
2018-yil noyabr oyida Tojikiston olimpiya terma jamoasi va bir necha kundan so‘ng Tojikiston terma jamoasi bosh murabbiyi sifatida ish boshlaydi. Uning qo‘l ostida terma jamoa JCh-2022 saralash doirasida qatnashadi va F guruhida ikkinchi o‘rinni egallaydi. Uchinchi bosqichga chiqish va Osiyo Kubogi—2023 ga to‘g‘ridan-to‘g‘ri yo‘llanmani qo‘lga kiritish uchun Tojikiston terma jamoasiga 4 ta gol yetishmaydi.
2021-yilda shartnomasi yakuniga yetgan Usmon Toshev Tojikiston terma jamoasini tark etadi. 2021-yil may oyida “Nurafshon” jamoasi bosh direktori lavozimiga tayinlangan. “Nurafshon” Pro-Liga 2021-yilgi mavsumida ortda qolgan 16 turdan so‘ng 24 ochko bilan 3-o‘rinni band etib turibdi.
2021-yil 7-oktabr sanasidan Usmon Toshev O‘FAda ish boshladi. Undan oldin terma jamoalar bo‘limini Aziz Haydarov boshqargandi.
Eslatib o‘tamiz, O‘zbekiston milliy terma jamoasi JCh—2022 ikkinchi saralash bosqichida muvaffaqiyatsiz ishtirok etgan va Qatarda o‘tkaziladigan mundialning hal qiluvchi saralash bosqichidan quruq qolgandi. Shundan keyin terma jamoa bosh murabbiyi Vadim Abramov va terma jamoalar markazi rahbari Aziz Haydarov ishdan ketgandi.
Izoh (0)