O‘zbekiston milliy terma jamoasining Jahon Chempionatiga chiqishi ko‘plab futbol muxlislari uchun uzoq yillardan beri armon bo‘lib kelmoqda. “Oq bo‘rilar” katta mundialda ishtirok etmagan bo‘lsa-da, kichik yosh toifasidagi futbolchilar bir necha bor Jahon chempionatlari qatnashchisiga aylangan. “Daryo” O‘zbekiston yoshlar terma jamoasining “kichik mundial”lardagi ishtiroki va ularda gol urgan futbolchilarni yodga oladi.
Yoshlar o‘rtasidagi Jahon chempionati — 2003
2003-yil 27-noyabrdan 19-dekabrga qadar BAAda o‘tkazilgan yoshlar o‘rtasidagi Jahon chempionatida O‘zbekiston terma jamoasi Argentina, Ispaniya, Mali kabi terma jamoalar bilan birgalikda B guruhidan o‘rin oldi. Maliga qarshi birinchi uchrashuvda O‘zbekiston yoshlari 2:3 hisobida mag‘lubiyatga uchradi. Islom Inomov va Aleksandr Geynrix gollar muallifiga aylandi.Ikkinchi turda Argentina bilan bahs olib borgan O‘zbekiston ilk daqiqalarda Aleksandr Geynrix tomonidan urilgan gol evaziga hisobni ochdi. Ammo Argentina 70-daqiqada Leandro Fernandes va 90+3-daqiqada Fernanda Kavenagining gollari evaziga 3 ochkoni ilib ketdi. Uchinchi turda esa O‘zbekiston Ispaniya yoshlari bilan to‘qnash keldi. 15-daqiqada Andres Inyesta tomonidan urilgan gol o‘yinda yagonaligicha qoldi va O‘zbekiston uchinchi o‘yinda ham mag‘lubiyatni qabul qilib oldi. Shu tariqa O‘zbekiston yoshlar terma jamoasi uchun ilk musobaqa omadsiz boshlandi.
O‘zbekiston terma jamoasi safida gol urgan futbolchilar
Aleksandr Geynrix (2 ta gol)
O‘zbekiston terma jamoasi sobiq hujumchisi Aleksandr Geynrix 1984-yil 6-oktabrda tavallud topgan. Bugun 37 yoshni qarshi olgan Geynrix O‘zbekiston futboli tarixidagi eng kreativ futbolchilardan biri hisoblanadi. Faoliyati davomida “SSKA Moskva”, “Paxtakor”, “Torpedo”, “Aqto‘be”, “Lokomotiv”, “Ordabasi” kabi jamoalarda o‘ynagan hujumchi ko‘plab sovrinlarni qo‘lga kiritgan. O‘zbekiston terma jamoasida esa 98 ta o‘yinda 32 ta gol urib, eng yaxshi ikkinchi to‘purar maqomini saqlab turibdi. Faqatgina Maksim Shatskix (34) undan ko‘proq gol urgan. Aleksandr 2018-yildan buyon Qozog‘istonning “Aqto‘be” jamoasi boshlig‘i sifatida faoliyat olib bormoqda.
Islom Inomov (1)
Islom Inomov esa O‘zbekiston yoshlar terma jamoasining Jahon chempionatidagi ilk goli muallifi bo‘ldi. Islom faoliyati davomida “Semurg‘”, “Buxoro”, “Paxtakor”, “Navbahor”, “Lokomotiv” (Tbilisi), “Andijon”, “Nasaf”, “Bunyodkor”, “Lokomotiv”, “Surxon” kabi jamoalarda o‘ynagan. Milliy terma jamoada esa 2004-yilda debyut qilib, 2013-yilda faoliyatiga yakun yasagan. Uning hisobida terma jamoa uchun 37 o‘yinda 2 ta gol mavjud.
Yoshlar o‘rtasidagi Jahon chempionati — 2009
O‘zbekiston yoshlar terma jamoasi 2009-yilgi Jahon chempionatida D guruhidan o‘rin oldi. Raqiblar esa Gana, Urugvay va Angliya kabi kuchli jamoalar edi. Birinchi turda bo‘lajak jahon chempioni Ganaga qarshi maydonga tushgan o‘zbekistonlik yigitlar 2:1 hisobida mag‘lubiyatga uchradi. O‘zbekistonning yagona goliga Sherzod Karimov mualliflik qildi. Ikkinchi turda Urugvay yosh “oq bo‘rilar”ga hech qanday imkoniyat qoldirmadi va 3:0 hisobida g‘alaba qozondi. Oxirgi turda esa Angliyaga qarshi uchrashuvda Ivan Nagayev 1 ochko keltirgan gol muallifiga aylandi. Durang natija bilan O‘zbekiston guruhda uchinchi o‘rinni egalladi va bu keyingi bosqichga chiqish uchun kamlik qildi.
O‘zbekiston terma jamoasi safida gol urgan futbolchilar
Sherzod Karimov (1)
Ikkita goldan biriga mualliflik qilgan Sherzod Karimov 1989-yilda Zarafshon shahrida tavallud topgan. Faoliyatini birinchi liga jamoasi “Shayxontohur”da boshlagan va keyin “Qizilqum” safiga o‘tgan. Navoiyda bir mavsum to‘p surganidan so‘ng “Paxtakor” futbolchini xarid qildi. Poytaxt jamoasi tarkibida 8 yil o‘ynagan Sherzod 158 o‘yinda maydonga tushib, 25 ta golga mualliflik qildi. Undan so‘ng Xitoyning “Sindao Chjunnen” jamoasiga o‘tib ketdi. 2017-yilda O‘zbekistonga qaytib, “Lokomotiv” sharafini ham himoya qilgan yarim himoyachi hozirda Pro-Liga vakili “Neftchi” jamoasida harakat qilmoqda.
Ivan Nagayev (1)
Ivan Nagayev 1989-yil 3-iyulda Toshkent viloyatining Bekobod shahrida tug‘ilgan. Faoliyatini “Nasaf”da boshlagan hujumchi “Metallurg”, “Bunyodkor”, “Lokomotiv”, “Buxoro”, “Dinamo”, “Ordabasi”, “So‘g‘diyona” kabi jamoalarda o‘ynagan. 2021-yil fevral oyidan buyon yana Bekobodning “Metallurg” jamoasida o‘ynamoqda.
Yoshlar o‘rtasidagi Jahon chempionati — 2013
O‘zbekiston yoshlar terma jamoasi uchun eng yaxshi Jahon chempionati. F guruhidan o‘rin olgan O‘zbekiston yoshlari Xorvatiya, Urugvay va Yangi Zelandiya bilan bahs olib boradigan bo‘ldi. Birinchi turda Yangi Zelandiya qiyinchiliksiz mag‘lub etildi (3:0). O‘zbekistonning gollariga Abbosbek Maxstaliyev, Igor Sergeyev, Diyor Turopov mualliflik qildi. Ikkinchi turda Xorvatiya bilan durang natija (1:1) qayd etildi. Marko Livayaning goliga Sardor Rahmonov bitta gol bilan javob qaytardi.Hal qiluvchi turda esa Urugvay O‘zbekistonni 4:0 hisobida mag‘lubiyatga uchratdi. O‘zbekiston 4 ochko bilan uchinchi o‘rinni egalladi va pley-offga yo‘l oldi (eng yaxshi uchinchi o‘rinni egallab). Nimochorak finalda Gretsiya O‘zbekiston yoshlarining raqibiga aylandi. Abbosbek Maxstaliyev, Igor Sergeyev va Sardor Rahmonovning gollari evaziga yunonlar taslim etildi. Chorak finalda Fransiyaga to‘qnash kelgan O‘zbekiston 0:4 hisobida yengildi va musobaqani tark etdi.
O‘zbekiston terma jamoasi safida gol urgan futbolchilar
Abbos Maxstaliyev (2)
Abbosbek Maxstaliyev 1994-yil 12-yanvarda Sirdaryoning Guliston shahrida tavallud topgan. Faoliyatini “Paxtakor” jamoasida boshlagan Abbos “Neftchi”, “Navbahor”, “Surxon”, “Yangiyer” kabi jamoalarda omadini sinab ko‘rgan. Abbos 2011-yil Meksikada o‘tkazilgan 17 yoshlilar o‘rtasidagi Jahon chempionatida yorqin o‘yin namoyish etgan futbolchilardan biri bo‘lgandi. Maxstaliyevga Fransiyaning “Monako” jamoasi qiziqish bildirgani haqida xabarlar bor edi. Lekin futbolchi O‘zbekistondan chetga chiqa olgani yo‘q. Abbos 2021-yilning boshida Farg‘onaning “Istiqlol” jamoasi safiga qo‘shildi. Keyinchalik klub mavsum o‘rtasiga bormay Pro-Ligadan chiqib ketdi.
Igor Sergeyev (2)
Igor Sergeyev 1993-yil Toshkentda tug‘ilgan. U ham Abbos kabi faoliyatini “Paxtakor”da boshlagan, keyinchalik bir qator xorijiy jamoalar “Beyjin Goan”, “Ad-Dafra”, “Aqtobe” sharafini himoya qildi. 2021-yil 19-iyul kuni Qozog‘istonning “Tobol” jamoasiga o‘tdi. 2013-yildan buyon O‘zbekiston terma jamoasidan chaqiruv oladi. Igor hozirgacha terma jamoa safida 53 o‘yinda ishtirok etib, 15 ta golni o‘z hisobiga yozdirib qo‘ygan.
Sardor Rahmonov (2)
Sardor Rahmonov 1994-yil 9-iyulda Toshkentda tavallud topgan. Muborakning “Mash’al” jamoasi tarbiyalanuvchisi bo‘lgan Sardor 2013-yilda “Lokomotiv” safiga o‘tadi. Toshkent jamoasida ishlari yurishmagan futbolchining keyingi manzili 2014-yilda Farg‘onaning “Neftchi” jamoasi bo‘ldi. Undan so‘ng “Buxoro”da o‘ynadi. Hozirda “OKMK” sharafini himoya qilayotgan Sardor 2013-yilgi mundialdan keyin faoliyatini bir tekisda olib borayotgan kam sonli futbolchilardan biri.
Diyor Turopov (1)
Diyor Turopov 1994-yilda Jizzaxda tug‘ilgan. G‘allaoroldagi mahalliy futbol maktabida tahsil olgan Diyor 2012-yilda “OKMK” akademiyasiga qabul qilinadi. 2013-yildan buyon asosiy tarkibda o‘ynay boshlagan. 2017-yildan buyon Toshkentning “Lokomotiv” jamoasi sharafini himoya qilib kelmoqda.
Yoshlar o‘rtasidagi Jahon chempionati — 2015
2015-yilgi mundialda O‘zbekiston terma jamoasi Germaniya, Gonduras, Fiji terma jamoalari bilan F guruhiga tushdi. Birinchi turda kutilmaganda Gondurasga 3:4 hisobida imkoniyat boy berildi. O‘zbekiston safida Dostonbek Hamdamov, Eldor Shomurodov va Zabihillo O‘rinboyev gol muallifiga aylandi. Ikkinchi turda esa Germaniya hech qanday qiyinchiliksiz 3:0 hisobida g‘alaba qozondi.Uchinchi turda O‘zbekiston Fijiga javobsiz 3 ta gol urdi. Bu safar ham Eldor Shomurodov va Zabihillo O‘rinboyev o‘z hisobiga gol yozdirib qo‘ydi. Uchinchi gol esa Mirjamol Qosimov hisobiga yozildi. Shu tariqa guruhda 3 ta jamoa bir xil 3 ochkodan qo‘lga kiritdi. O‘zbekiston esa to‘plar nisbati bo‘yicha qolgan jamoalardan yaxshiroq natija qayd etgan holda, ikkinchi o‘rin bilan pley-offga yo‘l oldi. Pley-offdagi ilk raqib Avstriya terma jamoasi bo‘ldi. Dostonbek Hamdamovning dubli O‘zbekistonni chorak finalga olib chiqdi. Chorak finalda Senegal jamoasi bilan to‘qnash kelgan o‘zbekistonliklar 0:1 hisobida mag‘lub bo‘ldi va musobaqani tark etdi.
O‘zbekiston terma jamoasi safida gol urgan futbolchilar
Dostonbek Hamdamov (3)
Dostonbek Hamdamov 1996-yil Toshkent viloyatining Bekobod tumanida tavallud topgan. Doston “Yangiyer” internat-maktabida futbol sirlarini o‘rgana boshladi. 2009-yilda esa “Bunyodkor” futbol maktabiga qabul qilinadi. 2014-yildan “Bunyodkor”ning asosiy jamoasida o‘ynay boshlaydi. 2018-yildan keyin “Anji”, “An-Nasr”, “Hatta” kabi jamoalar sharafini himoya qilgan futbolchi 2021-yil yozidan boshlab “Paxtakor” tarkibida o‘ynayapti. Dostonbek 2016-yilda O‘zbekiston milliy terma jamoasiga chaqiriladi va shu vaqtga qadar 26 ta o‘yinda ishtirok etib, 2 ta gol muallifiga aylangan.
Eldor Shomurodov (2)
Eldor Shomurodov hozirgi kunda o‘zbek futbolidagi eng yorqin yulduzlardan biri. Italiyaning “Roma” sharafini himoya qiladigan hujumchi 1995-yilda Surxondaryoning Jarqo‘rg‘on shahrida tavallud topgan. Eldorning otasi, amakisi futbolchi bo‘lgan. Shu muhitda katta bo‘lgan Eldor ham futbolga muhabbat qo‘yadi. 19 yoshida “Mash’al” jamoasining asosiy tarkibida maydonga tusha boshlagan hujumchi tez orada boshqa jamoalarning e’tiborini torta boshladi. Toshkentning “Bunyodkor” jamoasi 2015-yilda Shomurodovni o‘z safiga qo‘shib oladi. 2017-yilda Rossiyaning “Rostov” klubi Eldorni xarid qiladi. Bir necha yil rostovliklar sharafini himoya qilgan Eldor 2020-yilda Italiyaning “Jenoa” klubiga (7,5 million yevro evaziga) yo‘l oldi. Genuyaliklar tarkibida bir mavsum o‘ynagan hujumchi Joze Mourinyo ustozlik qiladigan “Roma” e’tiboriga tushdi. Rim klubi Shomurodov uchun 17,5 million yevro to‘ladi. Hozirda Eldor “Roma”da faoliyat olib boradi.
2015-yildan beri O‘zbekiston milliy terma jamoasida harakat qilayotgan futbolchi 44 o‘yinda 21 ta gol urgan va ayni damda faoliyatini davom ettirayotgan futbolchilar orasida eng yaxshi to‘purar bo‘lib turibdi.
Zabihillo O‘rinboyev (2)
Zabihillo O‘rinboyev 1995-yil 30-martda Toshkentda tug‘ilgan. “Bunyodkor” akademiyasi tarbiyalanuvchisi hisoblanadi. “Bunyodkor”dagi uch yilidan so‘ng futbolchi “OKMK” tarkibiga o‘tib ketadi. Undan so‘ng “Paxtakor”, “Metallurg” kabi jamoalarda o‘ynagan Zabihillo 2020-yildan buyon “Navbahor” safida faoliyatini davom ettirib kelmoqda.
Mirjamol Qosimov (1)
Mirjamol Qosimov 1995-yil Toshkentda tavallud topgan. “Bunyodkor” jamoasi tarbiyalanuvchisi. 2019-yildan boshlab “OKMK” tarkibida o‘ynab kelmoqda. 2015-yilgi yoshlar o‘rtasidagi Jahon chempionatida 4 ta o‘yinda ishtirok etib, 1 ta golni o‘z hisobiga yozdirib qo‘ygan.
Ma’rufjon Ochilov tayyorladi
Izoh (0)