2020-yilning dekabr oyida Vazirlar Mahkamasining qarori bilan Pro-Liga 2021-yilgi mavsumida harakat qilishi belgilangan “Aral Samali” ayni damga kelib muammolar qurshovida qolgani aytilmoqda.
PFL bosh direktori vazifasini bajaruvchi Diyor Imomxo‘jayevning ma’lum qilishicha, qoraqalpoq klubi 2-oktabr kuni “Aral” U-14, U-16, U-18 jamoalari bilan musobaqada o‘ynay olmasligi borasida PFLga xat jo‘natgan. Xatda asosiy tarkibning ham safar uchrashuvlarida ishtirok etishi ham so‘roq ostida ekani ko‘rsatilgan.
Bundan kelib chiqib xulosa qilinsa, klub moliyaviy muammolar ichida qolgan.
Vazirlar Mahkamasining 2020-yilning dekabr oyidagi “Qoraqalpog‘istonda professional futbolni rivojlantirish, “Aral” futbol jamoasini qo‘llab-quvvatlash, uning moddiy-texnik bazasini mustahkamlash hamda kadrlar salohiyatini oshirish chora-tadbirlari to‘g‘risida”gi qaroriga ko‘ra “Aral Samali” klubi istisno tariqasida Pro-Ligada ishtirok etishi belgilangandi. Mutasaddilarga 2021-yil davomida klubning moddiy-texnik bazasini yaratish, uni barcha zaruriy vositalar bilan ta’minlash vazifalari yuklatilishi belgilangandi.
Ushbu qaror muhokamaga qo‘yilganida jamoa 2021-yilgi mavsumdan boshlab Superligada ishtirok etishi qayd etilgandi. Biroq qarorning ushbu bandi ko‘plab muhokamalarga sabab bo‘ldi va keyinchalik qaror matniga o‘zgartirish kiritilib, “Aral” Pro-Ligada o‘ynashi belgilandi.
Mavzuga doir: Tarki odat amri mahol: o‘zbek futboli va istisnolar
Pro-Liga 2021-yilgi mavsumi birinchi bosqichidan keyin “Aral” 14 turda 13 ochko to‘plab, sakkiz jamoa ichida yettinchi o‘rinni egalladi va musobaqada qolish uchun kurashadigan bo‘ldi. Ikkinchi bosqichning ikki turidan keyin “Aral” 14 ochko bilan to‘rt jamoa orasida 3-o‘rinda bormoqda.
Izoh (0)