«Нурафшон» (собиқ «Бухоро») клуби бош директори лавозимида фаолият олиб борган Усмон Тошев ЎФАда терма жамоалар бўлими бошлиғи лавозимига тайинланди. Бу ҳақда ЎФА матбуот хизмати маълум қилди.
Усмон Тошев шу вақтга қадар Ўзбекистон терма жамоасида ёрдамчи мураббий, Ўзбекистон U-16 терма жамоаси бош мураббийи, Тожикистон терма жамоаси бош мураббийи лавозимларида фаолият олиб борган. «Дарё» қуйида мутахассиснинг фаолияти борасида батафсил маълумот беради.
Усмон Тошев 2000 йилда «Бухоро» жамоасида мураббийлик фаолиятини бошлайди ва у ерда 2008 йилга қадар фаолият олиб боради.
2005 йилда мураббийлик бўйича PRO лицензиясини қўлга киритади. 2006 йилда қисқа муддат Ўзбекистон терма жамоаси бош мураббийи Валерий Непомняшчийнинг ёрдамчиси бўлиб ишлайди.
2008 йилда эса Қаршининг «Насаф» жамоасини вақтинча бошқарган. Мавсум якунида жамоа чемпионатни 9-ўрин билан якунлади. 2009 йилда эса «Шўртан» жамоасида ишлаган. «Шўртан» 8-ўринни эгаллаган. 2009—2011 йиллар мобайнида Тошкентнинг «Спартак» жамоаси устози сифатида фаолият олиб боради.
2011 йилда «Насаф»да менежер ва спорт директори вазифасига тайинланади. Ўша мавсумда «Насаф» ОФК Кубогида чемпионликни қўлга киритганди. Ўзбекистон Кубогида эса финалга қадар етиб борган қаршиликлар «Пахтакор» жамоасига 1:3 ҳисобида мағлуб бўлди. Ички чемпионатда эса 53 очко жамғариб, иккинчи ўринни эгаллади. 2012 йилнинг май ойидан бошлаб ушбу жамоа бош мураббийига айланади. Тошев қўл остида жамоа 2012 йилда 4-ўрин билан якунлаган.
2014-2015 йиллар мобайнида Афғонистоннинг «Де Маиванд Аталан» жамоасида, 2017 йилда эса «Андижон» жамоасида ишлаган.
2018 йилда 16 ёшгача бўлган Ўзбекистон ёшлар терма жамоасини қисқа муддат бошқаради ва CAFA мусобақаси чемпионига айланди. Унинг шогирдлари финалда Тожикистон U-16 терма жамоаси устидан 3:1 ҳисобида ғалаба қозонади.
2018 йилнинг иккинчи ярмида эса Афғонистоннинг «Туфан Ҳерируд» жамоасида иш бошлайди. Ўша йилнинг ўзида Тошев жамоаси Афғонистон Премьер Лигасида чемпионликни қўлга киритади.
2018 йил ноябрь ойида Тожикистон олимпия терма жамоаси ва бир неча кундан сўнг Тожикистон терма жамоаси бош мураббийи сифатида иш бошлайди. Унинг қўл остида терма жамоа ЖЧ-2022 саралаш доирасида қатнашади ва F гуруҳида иккинчи ўринни эгаллайди. Учинчи босқичга чиқиш ва Осиё Кубоги—2023 га тўғридан-тўғри йўлланмани қўлга киритиш учун Тожикистон терма жамоасига 4 та гол етишмайди.
2021 йилда шартномаси якунига етган Усмон Тошев Тожикистон терма жамоасини тарк этади. 2021 йил май ойида «Нурафшон» жамоаси бош директори лавозимига тайинланган. «Нурафшон» Про-Лига 2021 йилги мавсумида ортда қолган 16 турдан сўнг 24 очко билан 3-ўринни банд этиб турибди.
2021 йил 7 октябрь санасидан Усмон Тошев ЎФАда иш бошлади. Ундан олдин терма жамоалар бўлимини Азиз Ҳайдаров бошқарганди.
Эслатиб ўтамиз, Ўзбекистон миллий терма жамоаси ЖЧ—2022 иккинчи саралаш босқичида муваффақиятсиз иштирок этган ва Қатарда ўтказиладиган мундиалнинг ҳал қилувчи саралаш босқичидан қуруқ қолганди. Шундан кейин терма жамоа бош мураббийи Вадим Абрамов ва терма жамоалар маркази раҳбари Азиз Ҳайдаров ишдан кетганди.
Изоҳ (0)