Monika Beluchchining sobiq turmush o‘rtog‘i Vensan Kassel va Tina Kunakining sevgi hikoyasi

Monika Beluchchining sobiq turmush o‘rtog‘i, aktyor Vensan Kassel 2018-yil 24-avgustda ikkinchi marta uylangan. U turmush o‘rtoq sifatida o‘zidan 30 yashar kichik Tina Kunakini tanlagan. Juftlikning sevgi hikoyasi haqida ma’lumot berib o‘tamiz.

Ta’tilda boshlangan munosabatlar

Aktyor endigina moda olamiga kirib kelgan, 18 yoshni qarshilaganiga hali hech qancha bo‘lmagan Tinani 2015-yilda uchratgan. Ularning har ikkisi ta’til vaqti Ibitsada uchrashgan. Syorfing bilan shug‘ullanayotgan Vensan Tinaning e’tiborini tortgan. Shu kuni kechqurun barda aktyorning nigohi bir gala odamlar qurshovida qah-qah otib kulayotgan qizga tushgan. Umumiy do‘stlari sabab tanishgan juftlik keyinroq suhbat qurgan. O‘sha lahzada Tina Vensandan syorfing uchishni o‘rgatishini so‘ragan. Kassel bunga javoban ertasi kuni tongga uchrashuv belgilagan.

Juftlik syorfing uchgan, keyin esa sayr qilishga qaror qilgan. Model aktyorning hayoti va suratga olish jarayoni bilan bog‘liq hikoyalarini diqqat bilan tinglagan. Kasselni qarshisidagi dilbar qizning energiyasi va ta’sirchanligi o‘ziga rom qilgan. O‘sha kundan boshlab ular har kuni ko‘risha boshlashgan. Vaqtni muntazam ravishda birga kechirish natijasida ularning o‘rtasida sevgi alangalari uchqunlay boshlagan. Ta’til tugaganidan keyin Kassel bir necha yildan buyon yashab kelayotgan mamlakati — Braziliyaga, Kunaki esa ota-onasining yoniga — Biarritsga qaytgan.

Yosh tanlamas sevgi 

Bir necha oy o‘tib Tina akalarini Vensan bilan tanishtirgan. Ular avvaliga bezovtalangan, ammo keyinroq singlisi singari aktyorga maftun bo‘lgan. 2016-yil avgustda ularning har ikkisi munosabatlarini yashirgan, ammo noyabrga kelib birgalikda ko‘rinish bergan. Juftlik Gran-Paladagi Victoria’s Secret shousiga borgan. Vensan yillar davomida orttirgan mashhurligidan kelib chiqib modelga dunyo podiumlarida tanilishni taklif qilishi mumkin edi, ammo qizning muvaffaqiyatga erishishi uchun aktyorning yonida ko‘rinish berishning o‘zi kifoya bo‘lgan. Shundan keyin qizning karyera borasida omadi chopgan, turli takliflar kelib tusha boshlagan.

Bir muddat Braziliyada yashagan mashhurlar keyinchalik Tina uchun Fransiyaga qaytib borishga rozi bo‘lgan. Gap shundaki, Kunakining ish joyi Parijda bo‘lgan. Qizig‘i shundaki, aktyor qaylig‘i bilan borganida uning sobiq rafiqasi shahar hayotidan charchaganini vaj qilib, u yerni tark etgan. 2017-yilning may oyida Monika aktyor Jil Lellush bilan, Vensan esa, tabiiyki, Tina bilan birga ko‘rinish bergan.

Jiddiylashgan munosabatlar

Mashhurlar 2018-yilni birgalikda kutib olgan. Keyin unashtiruv, undan keyin esa to‘y marosimi bo‘lib o‘tgan. Ular Fransiyaning janubi-g‘arbidagi shahar — Bidartda turmush qurgan. Bu vaqtda Vensan Biarritsdan uy xarid qilib ulgurgan. Vensan hamma vaqt serfarzand ota bo‘lishni istashini aytib kelgan (Monika bilan turmushidan ikki nafar qiz farzandi: Deva va Leoni bor). “Men g‘oyat oshiqman va farzandlarimiz bo‘lishiga ishonchim komil”. Ammo ko‘pchilik Tinaning karyeradan voz kechib, farzandli bo‘lishi mumkinligini imkonsiz deb hisoblagan. Ammo bunday bo‘lmagan. To‘ylaridan 8 oy vaqt o‘tib, 2019-yilda Amazoni ismli qiz farzand dunyoga kelgan. Bugungi kunda baxtli hayot kechirib kelayotgan juftlik 2021-yil 31-iyul kuni munosabatlarining olti yilligi, 25-avgust kuni esa to‘ylarining uch yilligini nishonlagan. Shaxsiy hayotlarida uyg‘unlik hukm suradigan er-xotin ish va munosabatlarini birlashtirib, farzandlari Amazoniga yetarli darajada vaqt ajratishning uddasidan chiqqan.

Shunga qaramay, Kunaki va Beluchchini bir-biri bilan solishtiradiganlar yo‘q emas. Aslida esa bir munosabat tugaganidan keyin boshqasi boshlanishi tabiiy va Tinaning o‘rnida boshqa bir qiz bo‘lishi ham mumkin edi. Jamoatchilik yosh qizga uylangani sabab fransuz aktyorini tanqid qilishdan to‘xtamaydi. Bularga esa Vensanning bir javobi bor: u 50 yosh va aynan shu sabab ham atrofdagilarning fikriga e’tibor bermay, nima xohlasa, shuni qiladi. Buni onasiga aytgan gaplaridan ham bilsa bo‘ladi: “Keksalikning yaqinlashishi g‘oyat ajoyib, ona. Bir deganda daf’atan aslida nimalarni yaxshi ko‘rishing, qaysilarini esa yo‘qligi haqida o‘ylay boshlaysan va senda munofiqlik uchun vaqt bo‘lmaydi”, — degan u.