Orzular ro‘yobi: Muxlisiga ko‘ngil qo‘ygan yulduzlar (foto)

Baxtini muxlislari orasidan topgan shou-biznes vakillari haqida ma’lumot berib o‘tamiz.

Liam Peyn va Mayya Genri

2015-yilda mashhurlikning cho‘qqisida bo‘lgan One Direction Nyu-Yorkda muxlislari bilan uchrashgan. Tashrif buyurganlar orasida advokat va multimillioner Tomas Dj Genrining 14 yashar qizi Mayya Genri ham bo‘lgan. Qiz sevimli yulduzlari bilan shunchaki suhbatlashmagan, balki birga suratga ham tushgan. Guruh solisti va Mayya o‘rtasida o‘sha vaqt sevgi alangasi uchqun olgan yoki yo‘qligi mavhum, biroq keyinchalik ularning har ikkisi ham o‘z yo‘lidan ketishga qaror qilgan. Qiz model sifatida o‘zini sinab ko‘rishni istagan, musiqachi esa pop yo‘nalishida ijod qiladigan Sheril Koul bilan 2018-yilga qadar uchrashgan. Oradan bir yil o‘tib Mayya va Genrining birgalikdagi suratlari tarqalgan, juftlikning o‘zi esa keyinchalik o‘rtasida munosabat borligini tasdiqlagan. 2020-yildagi lokdaun vaqtida esa Liam Mayaning qo‘lini so‘ragan. Xonanda 3 million dollar turadigan qimmatbaho uzuk sovg‘a qilgan. Shunga qaramay, 2021-yilda juftlik ayrilishga qaror qilganini ma’lum qilgan. Liam Stiv Bartlettning podkastida o‘zini bu borada aybdor his qilishini ma’lum qilgan. Bir muddatdan keyin ayrim manbalar Liam va Mayyani topishib olganini ma’lum qilgan. Shundan keyin ular ko‘plab tadbir va marosimlarga birga tashrif buyura boshlagan.

Metyu Lyuis va Anjela Jons

Aktyor “Garri Potter”da Nevil Dolgopups roli bilan mashhurlikka erishgan. 2016-yilning boshida Metyu Lyuis Universal Studios Orlando kompaniyasi tomonidan tashkillashtirilgan dunyo bo‘ylab o‘tkaziladigan tadbirda ishtirok etish uchun taklif qilingan. Uni kompaniya xodimi Anjela Jons kutib olgan. Qizga bir ko‘rishda oshiq bo‘lgan Metyu, 2016-yil Parijda uning qo‘lini so‘ragan. Juftlik 2018-yil Italiyaning Portofino shahrida turmush qurgan.

Jon Travolta va Kelli Preston

1978-yilda “Briolin” kinomyuziklining premyerasi bo‘lgan. Ko‘chada filmning posteriga ko‘zi tushgan 16 yashar Kelli, undagi Jon Travoltani bir ko‘rishda yoqtirib qolgan. Kinoteatrdan qaytib chiqayotganida esa dugonalariga vaqt soati kelib, bosh qahramon ijrochisiga turmushga chiqishini aytgan. Bunga javoban kulgan qizlar, uning gapini jiddiy qabul qilmagan. 1989-yilda Kelli “Ekspertlar” filmida bolaligidagi kumiri Jon Travolta bilan suratga tushgan. Ular o‘rtasida munosabatlar bir necha yildan so‘ng, har ikkisi jufti bilan xayrlashganidan keyingina boshlangan. 1991-yilda turmush qurgan Jon va Kelli oradan bir yil o‘tib farzandli bo‘lgan. Afsuski o‘g‘li Prestonga kam uchraydigan Kavasaki kasalligi tashxisi qo‘yilgan. Ammo ota-onasining urinishlari bilan bolaning jismoniy ahvoli barqaror bo‘lib qolgan. Keyinroq esa Ella va Benjamin ismli boshqa farzandlari dunyoga kelgan. Gollivudning eng baxtli juftliklari hisoblangan Kelli va Jon, barcha qiyinchilik va taqdir zarbalarini birgalikda yengib kelgan (2009-yilda to‘ng‘ich farzandi Preston vafot etgan). Kellida saraton tashxisi qo‘yilganida Jon unga kasallikni yengishga yordam berish uchun qo‘lidan kelgancha harakat qilgan. Ammo rafiqasi 2020-yil 13-iyunda hayotdan ko‘z yumgan.

Shahzoda Uilyam va Keyt Middlton

Keyt bolaligidanoq shahzoda Uilyamga muxlis bo‘lgan. “Keyt: bo‘lajak qirolicha” kitobi ustida ishlash jarayonida Keti Nikoll Kembrij gersoginyasining Jessika Hey maktabidagi sobiq sinfdoshi bilan suhbatlashgan. Uning aytishicha, yotoqxonadagi Keytning karavoti yonidagi devor kelishgan shahzodaning surati bilan bezalgan bo‘lgan. Keyt har gal Uilyamdan yaxshirog‘i yo‘q deb hazillashgan. Shunga qaramay, Keyt biografiyasidagi mazkur faktni doim inkor qilgan. Shuningdek, intervyusida yotoqxona devorida Uilyam emas, Levi’s brendining reklama posteri osilganini ta’kidlagan. Shu so‘zlardan keyin Uilyam unga qarab yuzida tabassum bilan: “Devorda mening 10 yoki 20 ta suratim osilgan bo‘lgan”, — degan. Keyt buni inkor qilgan. “U Levi’s kiyimidagi men edim degan”, — deb davom ettirgan Uilyam.

Stiv Xarvi va Mardjori Bridjes

1987-yilda allaqachon mashhur komik hisoblangan Stiv Memfisga stendap-shou uchun tashrif buyurgan. Bir vaqt zalga kechikib moda bo‘yicha mutaxassis va tadbirkor Marjori Brijes kirib kelgan. Bir ko‘rishida go‘zalligiga maftun bo‘lgan Stiv bir muddat tanaffusdan keyin “Bu ayol kimligi menga qorong‘i, ammo men unga, albatta, uylanaman”, — degan. Tashrif buyurganlar buni komikning navbatdagi hazili deb o‘ylagan. Tadbir tugaganidan keyin uni uchrashuvga taklif qilgan. Ular bir necha marta uchrashgan keyinchalik o‘zi bilan ovora bo‘lib ketgan. 2005-yilda qayta topishib olgan juftlik oradan ikki yil o‘tib turmush qurgan. Ularning aytishicha, yillar o‘tishi bilan o‘rtalaridagi muhabbat yanada mustahkamlanmoqda.

Billi Jo Armstrong va Adrienn Nesser

1990-yilda faoliyatini boshlagan “Green Day” guruhi tanilish uchun uncha katta bo‘lmagan ziyofatlar hamda katta klublarda chiqishga rozilik bergan. Shunday kichik konsertlardan biriga tashrif buyurgan 21 yashar Adrienn Nesser, ularning ijodiga mahliyo bo‘lib ertasi kuni ham kelishga qaror qilgan. Shundan keyin guruh a’zosi Billi bilan tanishgan. Bir-biriga ko‘ngil qo‘ygan yigit va qiz uchrashishga qaror qilgan. Ammo Billining Kaliforniya, Nesserning Minnesotda yashashi munosabatlarda qiyinchiliklar keltirib chiqargan. Ijodkor qizni o‘zinikiga ko‘chib o‘tishi uchun uning qo‘lini so‘rashi kerakligini tushunib yetgan. Juftlik 1994-yilda turmush qurgan. “Adriennda eski libos bo‘lgan va biz uyimning orqa hovlisida nishonlaganmiz”, — deb eslagan musiqachi. Turmush qurganiga 27 bo‘lgan Billi va Adrienning ikki nafar farzandi bor.