Моника Белуччининг собиқ турмуш ўртоғи Венсан Кассель ва Тина Кунакининг севги ҳикояси

Моника Белуччининг собиқ турмуш ўртоғи, актёр Венсан Кассель 2018 йил 24 августда иккинчи марта уйланган. У турмуш ўртоқ сифатида ўзидан 30 яшар кичик Тина Кунакини танлаган. Жуфтликнинг севги ҳикояси ҳақида маълумот бериб ўтамиз.

Таътилда бошланган муносабатлар

Актёр эндигина мода оламига кириб келган, 18 ёшни қаршилаганига ҳали ҳеч қанча бўлмаган Тинани 2015 йилда учратган. Уларнинг ҳар иккиси таътил вақти Ибицада учрашган. Сёрфинг билан шуғулланаётган Венсан Тинанинг эътиборини тортган. Шу куни кечқурун барда актёрнинг нигоҳи бир гала одамлар қуршовида қаҳ-қаҳ отиб кулаётган қизга тушган. Умумий дўстлари сабаб танишган жуфтлик кейинроқ суҳбат қурган. Ўша лаҳзада Тина Венсандан сёрфинг учишни ўргатишини сўраган. Кассель бунга жавобан эртаси куни тонгга учрашув белгилаган.

Жуфтлик сёрфинг учган, кейин эса сайр қилишга қарор қилган. Модель актёрнинг ҳаёти ва суратга олиш жараёни билан боғлиқ ҳикояларини диққат билан тинглаган. Касселни қаршисидаги дилбар қизнинг энергияси ва таъсирчанлиги ўзига ром қилган. Ўша кундан бошлаб улар ҳар куни кўриша бошлашган. Вақтни мунтазам равишда бирга кечириш натижасида уларнинг ўртасида севги алангалари учқунлай бошлаган. Таътил тугаганидан кейин Кассель бир неча йилдан буён яшаб келаётган мамлакати — Бразилияга, Кунаки эса ота-онасининг ёнига — Биаррицга қайтган.

Ёш танламас севги 

Бир неча ой ўтиб Тина акаларини Венсан билан таништирган. Улар аввалига безовталанган, аммо кейинроқ синглиси сингари актёрга мафтун бўлган. 2016 йил августда уларнинг ҳар иккиси муносабатларини яширган, аммо ноябрга келиб биргаликда кўриниш берган. Жуфтлик Гран-Паладаги Victoria’s Secret шоусига борган. Венсан йиллар давомида орттирган машҳурлигидан келиб чиқиб моделга дунё подиумларида танилишни таклиф қилиши мумкин эди, аммо қизнинг муваффақиятга эришиши учун актёрнинг ёнида кўриниш беришнинг ўзи кифоя бўлган. Шундан кейин қизнинг карьера борасида омади чопган, турли таклифлар келиб туша бошлаган.

Бир муддат Бразилияда яшаган машҳурлар кейинчалик Тина учун Францияга қайтиб боришга рози бўлган. Гап шундаки, Кунакининг иш жойи Парижда бўлган. Қизиғи шундаки, актёр қайлиғи билан борганида унинг собиқ рафиқаси шаҳар ҳаётидан чарчаганини важ қилиб, у ерни тарк этган. 2017 йилнинг май ойида Моника актёр Жил Леллуш билан, Венсан эса, табиийки, Тина билан бирга кўриниш берган.

Жиддийлашган муносабатлар

Машҳурлар 2018 йилни биргаликда кутиб олган. Кейин унаштирув, ундан кейин эса тўй маросими бўлиб ўтган. Улар Франциянинг жануби-ғарбидаги шаҳар — Бидартда турмуш қурган. Бу вақтда Венсан Биаррицдан уй харид қилиб улгурган. Венсан ҳамма вақт серфарзанд ота бўлишни исташини айтиб келган (Моника билан турмушидан икки нафар қиз фарзанди: Дева ва Леони бор). «Мен ғоят ошиқман ва фарзандларимиз бўлишига ишончим комил». Аммо кўпчилик Тинанинг карьерадан воз кечиб, фарзандли бўлиши мумкинлигини имконсиз деб ҳисоблаган. Аммо бундай бўлмаган. Тўйларидан 8 ой вақт ўтиб, 2019 йилда Амазони исмли қиз фарзанд дунёга келган. Бугунги кунда бахтли ҳаёт кечириб келаётган жуфтлик 2021 йил 31 июль куни муносабатларининг олти йиллиги, 25 август куни эса тўйларининг уч йиллигини нишонлаган. Шахсий ҳаётларида уйғунлик ҳукм сурадиган эр-хотин иш ва муносабатларини бирлаштириб, фарзандлари Амазонига етарли даражада вақт ажратишнинг уддасидан чиққан.

Шунга қарамай, Кунаки ва Белуччини бир-бири билан солиштирадиганлар йўқ эмас. Аслида эса бир муносабат тугаганидан кейин бошқаси бошланиши табиий ва Тинанинг ўрнида бошқа бир қиз бўлиши ҳам мумкин эди. Жамоатчилик ёш қизга уйлангани сабаб француз актёрини танқид қилишдан тўхтамайди. Буларга эса Венсаннинг бир жавоби бор: у 50 ёш ва айнан шу сабаб ҳам атрофдагиларнинг фикрига эътибор бермай, нима хоҳласа, шуни қилади. Буни онасига айтган гапларидан ҳам билса бўлади: «Кексаликнинг яқинлашиши ғоят ажойиб, она. Бир деганда дафъатан аслида нималарни яхши кўришинг, қайсиларини эса йўқлиги ҳақида ўйлай бошлайсан ва сенда мунофиқлик учун вақт бўлмайди», — деган у.