Avstraliyadagi hayvonot bog‘ida bir yildan buyon chaqaloq yig‘lamoqda. Ammo xavotirga o‘rin yo‘q, aslida bu bolaga taqlid qilishni o‘rganib olgan qush

Lirodumlar (chumchuqsimonlar oilasiga mansub qush) deyarli har qanday tovushni — bolg‘adan tortib, benoarrayu yoki avtomobil signaligacha takrorlay oladi. Avstraliyadagi hayvonot bog‘ida yashaydigan Exo laqabli yetti yoshli lirodum esa chaqaloq kabi yig‘lashga o‘rganib oldi, deb xabar beradi Meduza.

Hayvonot bog‘i xodimlarining so‘zlariga ko‘ra, Exo birinchi bor bir yil oldin “yig‘lagan”. Aftidan, u buni yosh tashrif buyuruvchilardan o‘rgangan. Ammo o‘sha vaqtda o‘xshatish hozirgidek ishonarli bo‘lmagan. Bir yil ichida hayvonot bog‘i koronavirus pandemiyasi sabab yopiq bo‘lganiga qaramay, lirodum o‘z ko‘nikmalarini takomillashtirishga muvaffaq bo‘lgan.

Hayvonot bog‘i vakillarining so‘zlariga ko‘ra, bolalar yig‘isi — lirodum o‘rganib olgan yagona tovush emas. Exo elektrodrel va o‘t o‘chiruvchilar sirenasini ham ajoyib o‘xshatadi. Mutaxassislarning ta’kidlashicha, qush o‘zini turdoshlariga xos bo‘lmagan tarzda tutmoqda — odatda lirodumlar insonlarga bog‘liq tovushlarga taqlid qilmaydi.

Avvalroq Britaniyada Beyonsening qo‘shig‘ini kuylagan to‘tiqush mashhurlikka erishgani to‘g‘risida xabar berilgandi.