Britaniyaning Lester shahri sudi De Montfort universitetining sobiq talabasi, 21 yoshli Ben Jonni ikki yilga shartli qamoq jazosi va klassik adabiyot o‘qishga hukm etdi, deb xabar beradi Esquire.
Bundan uch yil oldin Jon terrorizmda aybdor deb topilgan — u oq irq vakillarining ustunligiga oid 70 mingta hujjatni va bomba tayyorlash qo‘llanmalarini yuklab olgan. Shuningdek, Jon davlat axloq tuzatish dasturiga yuborilgan, ammo u taqiqlangan hujjatlarni ko‘chirib olishda davom etgan.
Shunda u Eternal Front’ga xat yozib, geylar, immigrantlar va liberallarga qarshi chiqish qilgan. Bundan tashqari, u Linkolnshirdagi fashistlarning yashirin guruhi a’zosi ekanligini ma’lum qilgan.
Sudya Timoti Spenser hukm chiqarayotib, Jonning harakatlarini “o‘smirlarga xos ahmoqlik” deya baholagan. U Jonni boshqa taqiqlangan materiallarni o‘rganmaslik uchun va’da berishga majbur qilgan, shuningdek, unga Jeyn Ostinning “Andisha va g‘urur” va Charlz Dikkensning “Ikki shahar haqida qissa”sini o‘qishni maslahat bergan. Shu bilan birga, endi u Entoni Trollop, Uilyam Shekspir va Tomas Xardining kitoblarini o‘qiydi.
Endilikda mahkum har to‘rt oyda o‘qigan kitoblari bo‘yicha sudda hisobot berib turadi. “4-yanvar kuni nima o‘qiganingizni so‘zlab berasiz va men sizni tekshiraman. Agar yolg‘on gapirsangiz, jazolanasiz”, — deya qo‘shimcha qilgan sudya. Bundan tashqari, politsiya besh yil davomida britaniyalikning internetdagi faolligini kuzatib boradi.
Izoh (0)