Britaniya rasmiylari Jeronimo laqabli sakkiz yoshli alpakada yirik shoxli qoramollarda uchraydigan sil kasalligi aniqlangani sabab uni o‘ldirishga qaror qabul qilgani to‘g‘risida xabar berilgandi. Esquire’ning yozishicha, aholining noroziligiga qaramay, alpaka baribir o‘ldirilgan.
Hayvonni infeksiya tarqatishi mumkinligi xavfi sabab o‘ldirish bo‘yicha qaror 4-sentabrga qadar amalda edi, biroq uning egasi Xelen Makdonald buni mustaqil amalga oshirishni istamagan. Jeronimoni o‘ldirish uchun uning uyiga Buyuk Britaniya Atrof-muhit va qishloq xo‘jaligi departamenti xodimlari politsiya hamrohligida kelgan. Norozilik namoyishchilari oxirgi marta qotillikning oldini olishga urinishganida uni fermadan olib chiqib ketishgan.
Xelen Makdonald Jeronimoni Yangi Zelandiyadan Britaniyaga 2017-yilda olib kelgan, biroq silga topshirgan ikkita testi ham ijobiy chiqqani sabab mamlakatga kelganidan buyon karantinda saqlangan.
Makdonald Jeronimoning testlariga shubha bildirib, hayvon tahlillardan oldin silga emlangan bo‘lsa, yolg‘on natijalarni chiqarishi mumkinligini ta’kidlagan. Jeronimo ushbu infeksiyaga qarshi emlangan. Yangi Zelandiyada topshirilgan testlar javobi salbiy chiqqan.
Makdonald London yuqori sudidagi apellyatsiyada yutqazib qo‘ygan, biroq uni mustaqil o‘ldirishdan bosh tortgan. Jeronimoning himoyasiga o‘n minglab britaniyaliklar chiqqan, jumladan, mamlakat bosh vazirining otasi Stenli Jonson ham. Alpakani qutqarish bo‘yicha petitsiya 140 mingdan ortiq imzo to‘plagan edi.
Izoh (0)