Британиянинг Лестер шаҳри суди Де Монтфорт университетининг собиқ талабаси, 21 ёшли Бен Жонни икки йилга шартли қамоқ жазоси ва классик адабиёт ўқишга ҳукм этди, деб хабар беради Esquire.
Бундан уч йил олдин Жон терроризмда айбдор деб топилган — у оқ ирқ вакилларининг устунлигига оид 70 мингта ҳужжатни ва бомба тайёрлаш қўлланмаларини юклаб олган. Шунингдек, Жон давлат ахлоқ тузатиш дастурига юборилган, аммо у тақиқланган ҳужжатларни кўчириб олишда давом этган.
Шунда у Eternal Front’га хат ёзиб, гейлар, иммигрантлар ва либералларга қарши чиқиш қилган. Бундан ташқари, у Линколнширдаги фашистларнинг яширин гуруҳи аъзоси эканлигини маълум қилган.
Судья Тимоти Спенсер ҳукм чиқараётиб, Жоннинг ҳаракатларини «ўсмирларга хос аҳмоқлик» дея баҳолаган. У Жонни бошқа тақиқланган материалларни ўрганмаслик учун ваъда беришга мажбур қилган, шунингдек, унга Жейн Остиннинг «Андиша ва ғурур» ва Чарльз Диккенснинг «Икки шаҳар ҳақида қисса»сини ўқишни маслаҳат берган. Шу билан бирга, энди у Энтони Троллоп, Уильям Шекспир ва Томас Хардининг китобларини ўқийди.
Эндиликда маҳкум ҳар тўрт ойда ўқиган китоблари бўйича судда ҳисобот бериб туради. «4 январь куни нима ўқиганингизни сўзлаб берасиз ва мен сизни текшираман. Агар ёлғон гапирсангиз, жазоланасиз», — дея қўшимча қилган судья. Бундан ташқари, полиция беш йил давомида британияликнинг интернетдаги фаоллигини кузатиб боради.
Изоҳ (0)