O‘zbekiston mustaqilligining 30 yilligi munosabati bilan 1—5-sentabr kunlari dam olish deb e’lon qilingani bois pensiya va nafaqalarni to‘lab berish muddati uzaytirilmoqda. Bu haqda Pensiya jamg‘armasi va Xalq bankining qo‘shma bayonotida qayd etilgan, deb xabar beradi “Gazeta.uz”.
Bugunga qadar Prezidentning 2017-yil 2-fevraldagi PQ-2753-sonli farmoniga muvofiq, pensiya va nafaqa pullari har oy birinchi bank ish kunidan boshlab 27-sanasiga qadar to‘lab kelinayotgan edi.
Xususan, to‘lovlar kunlik grafik asosida (dam olish kunlaridan tashqari) mahalla fuqarolar yig‘inlari va fuqarolarning yashash manziliga borgan holda yetkazib kelingan.
Prezidentning 2020-yil 3-dekabrdagi “2021-yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi farmoniga asosan, 1—5-sentabr kunlari barcha soha vakillari uchun dam olish kuni deb e’lon qilingan.
Shu munosabat bilan fuqarolar o‘rtasida tushunmovchiliklar yuzaga kelishining oldini olish hamda pensiya va nafaqa oluvchilarning ovoragarchiliklariga yo‘l qo‘ymaslik maqsadida Pensiya jamg‘armasi va Xalq banki bayonot bilan chiqqan.
Unga ko‘ra, sentabr oyi uchun beriladigan pensiya va nafaqa to‘lovlari naqd pul shaklida 6—7-sentabr sanasidan boshlab amalga oshiriladi hamda belgilangan muddatlargacha to‘lanishi ta’minlanadi.
Shuningdek, pensiya va nafaqa to‘lovlarini naqd pulsiz shaklda oluvchi fuqarolarga mablag‘lar 6—7-sentabr kunlari ularning bank plastik kartalariga o‘tkazib beriladi.
Avvalroq Prezident Shavkat Mirziyoyevning farmoni bilan 1-sentabrdan boshlab budjet tashkilotlari xodimlarining ish haqi, pensiya, stipendiya va nafaqalar miqdori 1,1 barobarga oshirilishi to‘g‘risida xabar berilgandi. Farmonga ko‘ra, pensiyani hisoblashning bazaviy miqdori — oyiga 289 000 so‘m, yoshga doir eng kam pensiyalar — oyiga 565 000 so‘m, bolalikdan nogironligi bo‘lgan shaxslarga beriladigan nafaqa — oyiga 622 000 so‘m etib belgilangan.
Izoh (0)