Toshkentda bo‘lib o‘tgan Islom taraqqiyot banki boshqaruv kengashining 46-yillik anjumanida nutq so‘zlagan Prezident Shavkat Mirziyoyev kapitali 500 million dollarga yetkazilishi ko‘zda tutilgan yangi jamg‘arma haqida gapirdi. Bu haqda “Daryo” muxbiri xabar bermoqda.
“Bizning kambag‘allikni qisqartirish va tadbirkorlikni rivojlantirishga qaratilgan sa’y-harakatlarimizni qo‘llab-quvvatlaydigan yangi loyiha — Iqtisodiy imkoniyatlarni kengaytirish jamg‘armasini tashkil etish bo‘yicha kelishuvning mazkur anjuman doirasida imzolangani uchun Islom taraqqiyot banki va Saudiya Arabistoni Podshohligi hukumatiga o‘z tashakkurimizni bildiramiz.
Kapitali 500 million dollarga yetkazilishi ko‘zda tutilgan mazkur jamg‘arma yoshlarimiz, ayollarimiz va qishloq aholisini tadbirkorlikka jalb qilish uchun zarur sharoitlar yaratishga xizmat qiladi. Mintaqamizda dolzarb bo‘lgan ekologik muvozanatni ta’minlash uchun barcha davlatlar bilan birgalikda faol sa’y-harakatlarni amalga oshirishimiz zarur.
Bu borada Birlashgan Millatlar Tashkiloti shafeligida tuzilgan Ko‘p sheriklik trast jamg‘armasi faoliyatini jadallashtirish lozim. Shu bilan birga, BMTning Bosh Assambleyasida ma’qullangan Orolbo‘yi mintaqasida ekologik innovatsiyalar va texnologiyalar hududini tashkil etish jarayonini bankning qo‘llab-quvvatlashi va ko‘magiga tayanamiz”, — dedi Shavkat Mirziyoyev.
Bundan avval Shavkat Mirziyoyev ishtirokidagi ITB sammiti avvalida Qur’on tilovat qilingani haqida xabar berilgandi.
Izoh (0)