Bosh prokuratura ijtimoiy tarmoqlarda tarqalgan Surxondaryoda sportchiga bir necha kishi tomonidan hujum uyushtirilgani tasvirlangan videoga munosabat bildirdi.
Ijtimoiy tarmoqlarda Surxondaryo viloyatining Denov tumanida 2021-yilning 28-may kuni bir nafar sportchiga qarshi 4 ta avtomashinada kelgan shaxslar sovuq qurollar bilan hujum uyushtirgani tasvirlangan video tarqaldi. O‘zini himoya qilishga majbur bo‘lgan sportchi juda og‘ir tan jarohati olgan.
Idoraning ma’lum qilishicha, videoda ko‘rsatilgan holat yuzasidan 29-may kuni Denov tumani IIB huzuridagi tergov bo‘limi tomonidan Jinoyat kodeksining 277-moddasi (bezorilik) bilan jinoyat ishi qo‘zg‘atilib, tergov harakatlari olib borilgan.
Tergov davomida 7 nafar shaxs ayblanuvchi tariqasida jalb qilinib, barchasiga qamoqqa olish ehtiyot chorasi qo‘llanilgan. Tergov harakatlari 23-avgust kuni tamomlangan. Hozirda jinoyat ishi sudga yuborish arafasida turibdi.
Avvalroq Qarshida chempion yigit o‘ldirilgani va uning o‘limida ayblanayotgan 6 nafar shaxs qamoqqa olingani to‘g‘risida xabar berilgandi.
Izoh (0)