1-sentabr kuni Shavkat Mirziyoyevning Turkiya prezidenti Rajab Toyyib Erdo‘g‘on bilan telefon orqali muloqoti bo‘lib o‘tdi, deb xabar bermoqda Prezident matbuot xizmati.
Qayd etilishicha, suhbat avvalida Turkiya rahbari Prezident va O‘zbekistonning ko‘p millatli xalqini mamlakat mustaqilligining 30 yilligi bilan samimiy qutladi. Turkiya xalqi nomidan O‘zbekistonga tinchlik-osoyishtalik, farovonlik va ravnaq tilaklarini izhor etdi.
Suhbat davomida prezidentlar ikki tomonlama hamkorlik yuzasidan fikr almashdi. 2021-yil boshidan o‘zaro savdo ko‘rsatkichlari ikki barobar o‘sgani va 240 dan ortiq qo‘shma korxona tashkil etilgani qayd etildi.
Mamlakatlar yetakchi kompaniyalarining kooperatsiyasi kuchayib bormoqda, jumladan, energetika, sanoat, qishloq xo‘jaligi, infratuzilma, turizm va boshqa sohalarda muhim investitsiya loyihalari amalga oshirilmoqda. Qo‘shma ta’lim va madaniy-gumanitar dasturlar muvaffaqiyatli joriy qilinmoqda. Xususan, shu yilning avgust oyida turkiyalik yetakchi mutaxassislar Toshkent va Samarqand shaharlaridagi arxitektura-qurilish institutlariga rahbar bo‘ldi.
Yetakchilar bo‘lajak oliy darajadagi tadbirlar rejasini, shu jumladan, Strategik hamkorlik kengashining navbatdagi yig‘ilishiga tayyorgarlik masalalarini ham ko‘rib chiqdi.
Afg‘onistondagi harbiy-siyosiy ahvol keskinlashishi ta’sirida mintaqadagi vaziyat rivojlanishiga alohida e’tibor qaratildi. Mintaqaviy xavfsizlik va barqarorlikni ta’minlash masalalari yuzasidan aloqalar va ko‘p tomonlama muloqotni davom ettirish muhim ekani ta’kidlandi.
Bundan avval Dubay amiri Shavkat Mirziyoyevni O‘zbekiston mustaqilligining 30 yilligi bilan tabriklagani haqida xabar berilgan edi. “Tolibon” harakati ham O‘zbekiston xalqi va rahbariyatini Mustaqillik bayrami bilan qutlab, tabrik maktubi yo‘lladi.
Mavzuga doir:
Izoh (0)