Ҳуқуқ ҳимоячиси Ҳайитбой Ёқубов 65 ёшида вафот этди

Хоразмда «Нажот» номли ташкилотни юритадиган ҳуқуқ ҳимоячиси Ҳайитбой Ёқубов 28 август куни 65 ёшида вафот этди.

«Америка овози»нинг ёзишича, у узоқ йиллардан бери инсон ҳуқуқлари учун курашиб келган. Мажбурий меҳнат ва коррупцияга қарши маҳаллий равишда тарғибот олиб бориб, фермерлар ва ишчиларни ҳимоя қилган.

«Gazeta.uz»нинг қайд этишича, Ўзбекистонда ҳокимият алмашганидан сўнг бошқа ҳуқуқ ҳимоячилари билан бир қаторда Ҳаитбой Ёқубов давлат органлари ва халқаро ташкилотлар томонидан ўтказиладиган турли лойиҳа ва тадбирларга таклиф этила бошланди. Аммо у 2020 йилда асос солган «Нажот» ташкилоти ҳали ҳам рўйхатдан ўтказилмаган. 2018 йилда у «Америка овози»га берган интервьюсида рўйхатдан ўтказиш учун 19 марта ариза берганини айтган.

АҚШнинг Тошкентдаги элчихонаси марҳумнинг яқинлари, дўстлари ва ҳамкасбларига чуқур ҳамдардлик билдирди. Элчихона хабарида айтилишича, Ҳаитбой Ёқубов 29 йил инсон ҳуқуқлари ҳимоячиси сифатида фаолият юритган ва Ўзбекистонда ҳуқуқбонлик фаолиятининг пайдо бўлиши билан бевосита боғлиқ.

«У Ўзбекистонда фуқаролик жамияти ва инсон ҳуқуқлари стандартларини шакллантиришга катта ҳисса қўшди. Биз унинг, айниқса, Ўзбекистоннинг шимоли-ғарбий қисмида, лавозимини суиистеъмол қилиш ва фундаментал ҳуқуқлар барча кўринишдаги бузилиш ҳолатларидан азият чекканларни қўллаб-қувватлашга бўлган улкан садоқати ва тайёрлигидан руҳланардик», — дейилади хабарда.