Ijtimoiy tarmoqlarda Rossiyada faoliyat olib boruvchi, o‘zini O‘zbekiston fuqarosiman, deb tanishtirgan shaxs “O‘zbekistonda ayolim vaksina olib, o‘lim yoqasida!” deb aytgan videomurojaat tarqaldi. Sog‘liqni saqlash vazirligi bunga munosabat bildirdi.
Unda aytilishicha, ushbu fuqaroning murojaati bo‘yicha Namangan viloyati Sog‘liqni saqlash boshqarmasi tomonidan viloyatning barcha shahar va tuman tibbiyot birlashmalarida dastlabki o‘rganishlar olib borilmoqda. Ayni damda murojaatchining manzili va shaxsi aniq ko‘rsatilmaganligi tufayli telefon orqali murojaat bo‘lganligi tasdiqlanmagan.
Shuningdek, Namangan viloyat Sog‘liqni saqlash boshqarmasi besh oydan beri davom etayotgan vaksinatsiya jarayonida emlangan fuqarolarda biror marotaba jiddiy nojo‘ya ta’sir bo‘lmaganligini ma’lum qilgan.
“Boshqarmaga hech bir fuqarodan vaksina sabab nojo‘ya ta’sirlar borasida murojaat kelib tushmagan.
Sizlardan shuni so‘rab qolamizki, mabodo yuqoridagi kabi holatlar kuzatilsa, yashash manzilingiz, o‘zingiz va yaqinlaringiz to‘g‘risida to‘liq ma’lumot bersangiz, tezkorlik bilan o‘rganib, holat bo‘yicha batafsil ma’lumot beramiz”, — deyiladi vazirlik xabarida.
Avvalroq ijtimoiy tarmoqlarda Xorazm viloyatida vaksina olgandan so‘ng ahvoli og‘irlashgan fuqaro haqida videolavha tarqalgach, Sog‘liqni saqlash vazirligi ushbu vaziyatni nazoratga olgani, uning ahvolini o‘rganish, bu holat nima sababdan yuz berganiga aniqlik kiritish maqsadida tezkor mutaxassislar guruhi tuzilgani haqida xabar bergan edi. Keyinroq SSV xorazmlik ayolning salomatligidagi o‘zgarishlar koronavirusga qarshi emlash bilan bog‘liq emasligini ma’lum qildi.
Oradan bir necha kun o‘tib, “Namanganda vaksina olgan ayol gapirmaydigan, o‘rnidan turolmaydigan bo‘lib qoldi” mazmunida xabar tarqaldi. Vazirlik yana bayonot bilan chiqib, ayol vaksinaning faqatgina bitta dozasini bundan ikki oy oldin olganini, shu ma’lumotning o‘ziyoq fuqaroning sog‘lig‘idagi o‘zgarish emlash jarayonlariga mutlaqo bog‘liq emasligini aniq ko‘rsatishini ma’lum qildi va provokatsion va feyk xabarlar tarqatib, aholi orasida vaksinatsiya jarayonlariga ishonchsizlik paydo qilishga urinishdan tiyilishni so‘radi.
Izoh (0)