O‘zbekiston Fanlar akademiyasi Genomika va bioinformatika markazi tomonidan yaratilayotgan “pomidor-vaksina” to‘g‘risidagi xabarni rossiyalik immunolog, tibbiyot fanlari nomzodi Nikolay Kryuchkov sharhladi. Bu haqda “KP.ru” nashrida e’lon qilingan maqolaga tayanib, Telegram’dagi “Vaksinauz” kanali xabar berdi.
Kryuchkovning aytishicha, yeyiladigan vaksinalar ustidan tajribalar o‘tgan asrning 90-yillaridan boshlangan va hozirgacha “istiqbolli sanalgani uchun” tajribalar davom etmoqda.
U “fitovaksina”larning 5 ijobiy tomonini sanab o‘tdi:
- qulaylik, og‘riq yo‘qligi. Ignada ukol qilishga hojat qolmaydi. Yeysan-u, qutulasan;
- nojo‘ya ta’sirlar kam – vaksinadan keyingi reaksiyalar oddiy vaksinalarnikiga nisbatan kam bo‘ladi;
- emlash xonalari, tibbiyot xodimlari, sterillikni saqlash va boshqa shart-sharoitlarga ketadigan xarajatlar qisqaradi;
- saqlash uchun alohida muzlatkichlar va muzlatkichlar bilan jihozlangan transport vositalari kerak bo‘lmaydi;
- ishlab chiqarish arzonga tushadi. Bioreaktorlarda yoki boshqa uskunalar yordamida ishlab chiqariladigan vaksinalardan kamroq xarajat talab qiladi.
Ta’kidlanishicha, hozirda dunyoda ham, O‘zbekistonda ham iste’mol qilinadigan vaksinalarni yaratish bo‘yicha tajribalar davom ettirilmoqda. Ammo hali birorta ham bunday vaksina klinik amaliyotda qo‘llanilmayapti.
Avvalroq o‘zbek olimlari pomidordan koronavirusga qarshi vaksina yaratgani to‘g‘risida xabar berilgandi. Ta’kidlanishicha, pomidor iste’mol qilinsa, u oshqozonimizda parchalanib, antitanalar hosil qiladi.
Izoh (0)