“Bu halol insonning butun umri mehnatda o‘tdi” – Shavkat Mirziyoyev adabiyotshunos olim Ibrohim G‘afurov haqida

Prezident Shavkat Mirziyoyevning qator farmonlariga muvofiq, O‘zbekiston Mustaqilligining 30 yilligi munosabati bilan bir guruh o‘zbekistonliklar faxriy unvonlar, orden va medallar bilan taqdirlangan edi.

Bugun, 30-avgust kuni Ko‘ksaroyda ushbu mukofotlarni topshirish marosimi bo‘lib o‘tmoqda.

“Daryo” muxbiri Mirolim Isojonovning xabar berishicha, davlat rahbari “O‘zbekiston Qahramoni” unvoni bilan taqdirlangan adabiyotshunos olim Ibrohim G‘afurov haqida fikr bildirgan.

“O‘zbek adabiyotining zabardast namoyondasi, atoqli tarjimon Ibrohim aka G‘afurov timsolida adabiyotimizning pok, halol, kamtarin katta vakilini ko‘raman. Bu inson butun umr mehnat qildi, umri shukronalikda o‘tdi.

Hozirgi kunda ham ko‘plab shoir va yozuvchilar, tarjimonlar Ibrohim akani adabiyot sohasidagi ustozim deydi, unga munosib shogird bo‘lishga harakat qiladi.

Men Erkin aka Vohidov va Abdulla aka Oripovlar bilan do‘st edim. Biz Erkin Vohidov bilan kechalari ko‘p masalalar haqida gaplashardik. U kishi "Agar o‘zbek tilining boyligini, chiroyini bilishni xohlasangiz, Ibrohim akaga murojaat qilish kerak", deb aytardi. Abdulla aka bilan Zomin maktabini birgalikda tashkil qilganmiz.

Ibrohim akaning ko‘p yillik mehnatlarini qadrlab, ularni “O‘zbekiston Qahramoni” unvoniga munosibligi uchun farmonga imzo qo‘ydim. O‘ylaymanki, Ibrohim aka singari mehnatkash ijodkorlar safi yanada kengayadi”, dedi Prezident.

Ma’lumot uchun, “O‘zbekiston Qahramoni” oliy darajadagi unvon bo‘lib, 1994-yilda ta’sis etilgan. O‘zbekiston fuqarolariga davlat va xalq oldidagi qahramonona jasorat ko‘rsatish bilan bog‘liq xizmatlari uchun O‘zbekiston Prezidenti tomonidan beriladi. Unvon ayrim hollarda O‘zbekiston fuqarosi bo‘lmagan shaxslarga ham berilishi mumkin.

Ushbu unvon bilan taqdirlangan shaxsga oliy nishon — “Oltin yulduz” medali va unvon berilganligi to‘g‘risidagi hujjat topshiriladi. Ushbu medal 750 darajali (probali) oltin qotishmasidan tayyorlanadi va old tomonida har bir qirrasining ikki yonbag‘ridan oltin nurlar taralgan sakkiz qirrali yulduz shaklida bo‘ladi.

“O‘zbekiston Qahramoni” unvoni bilan taqdirlangan shaxslar oylik ish haqiga yoki pensiyaga qo‘shimcha ravishda eng kam oylik ish haqi miqdorida oy sayin to‘lanadigan ustama mukofot oladi, qonun hujjatlarida belgilab qo‘yilgan imtiyozlardan foydalanadi.