Ўзбекистон Фанлар академияси Геномика ва биоинформатика маркази томонидан яратилаётган «помидор-вакцина» тўғрисидаги хабарни россиялик иммунолог, тиббиёт фанлари номзоди Николай Крючков шарҳлади. Бу ҳақда «KP.ru» нашрида эълон қилинган мақолага таяниб, Telegram’даги «Вакцинауз» канали хабар берди.
Крючковнинг айтишича, ейиладиган вакциналар устидан тажрибалар ўтган асрнинг 90 йилларидан бошланган ва ҳозиргача «истиқболли саналгани учун» тажрибалар давом этмоқда.
У «фитовакцина»ларнинг 5 ижобий томонини санаб ўтди:
- қулайлик, оғриқ йўқлиги. Игнада укол қилишга ҳожат қолмайди. Ейсан-у, қутуласан;
- ножўя таъсирлар кам – вакцинадан кейинги реакциялар оддий вакциналарникига нисбатан кам бўлади;
- эмлаш хоналари, тиббиёт ходимлари, стерилликни сақлаш ва бошқа шарт-шароитларга кетадиган харажатлар қисқаради;
- сақлаш учун алоҳида музлаткичлар ва музлаткичлар билан жиҳозланган транспорт воситалари керак бўлмайди;
- ишлаб чиқариш арзонга тушади. Биореакторларда ёки бошқа ускуналар ёрдамида ишлаб чиқариладиган вакциналардан камроқ харажат талаб қилади.
Таъкидланишича, ҳозирда дунёда ҳам, Ўзбекистонда ҳам истеъмол қилинадиган вакциналарни яратиш бўйича тажрибалар давом эттирилмоқда. Аммо ҳали бирорта ҳам бундай вакцина клиник амалиётда қўлланилмаяпти.
Аввалроқ ўзбек олимлари помидордан коронавирусга қарши вакцина яратгани тўғрисида хабар берилганди. Таъкидланишича, помидор истеъмол қилинса, у ошқозонимизда парчаланиб, антитаналар ҳосил қилади.
Изоҳ (0)