Toshkentda Turkiyadan mamlakatda noqonuniy ravishda dori vositalarni olib kirishga uringan shaxs qo‘lga olindi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, “Toshkent-Aero” ixtisoslashtirilgan bojxona kompleksining Kontrabandaga qarshi kurashish va bojxona auditi bo‘limi tezkor vakillari tomonidan tomonidan avvaldan olingan ma’lumotlarga asosan Istanbul—Toshkent yo‘nalishi bo‘yicha uchib kelib, “yashil” yo‘lak orqali harakatlangan K.S. ismli shaxsning yuklari bojxona ko‘rigidan o‘tkazilgan.
Ko‘rik davomida uning yuklari ichida bojxona xodimining og‘zaki so‘rovida aytilmagan, dastlabki hisob-kitoblarga ko‘ra umumiy narxi, taxminan, 78 million 650 ming so‘mga teng 513 dona turli xil dori vositalari borligi aniqlangan.
Shuningdek, Toshkent viloyati Ohangaron tumani hududida tezkor tadbir o‘tkazilganda Yu.Sh. ismli shaxs boshqaruvidagi Damas’da olib kelingan, O‘zbekiston fuqarosi S.I.ga tegishli bo‘lgan umumiy qiymati 180 million so‘mlik 6 ming quti “Cefoperazone” nomli dori vositalarini xaridorga sotilayotgan vaqtida xodimlar tomonidan to‘xtatib qolingan.
Hozirda mazkur holatlar yuzasidan bojxona organlari tomonidan surishtiruv harakatlari davom ettirilmoqda.
Avvalroq Chilonzorda kuchli ta’sir qiluvchi dori vositalarini noqonuniy sotayotgan dorixona aniqlanib, jinoyat ishi qo‘zg‘atilgani, Toshkent va Sirdaryo viloyatlarida talab yuqori bo‘lgan dori vositalarini qimmat narxda sotishga uringan shaxslar qo‘lga olingani to‘g‘risida xabar berilgandi.
Izoh (0)