Ijtimoiy tarmoqlarda Toshkent metropolitenida nosozlik sodir bo‘lib, poyezd tunnel ichida to‘xtab qolgani aks etgan videolar tarqaldi. Holat yuzasidan “O‘zbekiston temir yo‘llari” matbuot xizmati izoh berdi.
Qayd etilishicha, 28-avgust soat 14:35 atrofida “Oybek” bekatidan “Toshkent” bekatiga harakatlanayotgan elektropoyezd mashinisti harakat tarkibida nosozlikni sezib, tegishli yo‘riqnomaga asosan harakat xavfsizligini ta’minlash maqsadida elektropoyezdni to‘xtatgan.
Yo‘riqnomaga asosan ortidan kelgan harakat tarkibi yo‘lovchilarni “Oybek” bekatida tushirilib, yordam tariqasida yuborilgan. Nosoz harakat tarkibi yo‘lovchilari “Toshkent” bekatiga tushirilib, texnik ko‘rikka yuborilgan.
Nosozlikni bartaraf etish vaqti 9 daqiqani tashkil etgan.
Bundan avval, Toshkent metropolitenining “Kosmonavtlar” bekatida shubhali buyum topilgani haqida xabar berilgan edi. Yo‘lovchilar poyezddan tushirib yuborilib, tarkib tekshirish punktiga yuborilgan.
Qayd etish joizki, mart oyidan buyon Toshkent metropoliteni bilan bog‘liq shu kabi voqealar tez-tez yuz bermoqda. Xususan, 18-mart kuni “Olmazor” (Chilonzor yo‘li) va “Bekat-1” (Sergeli yo‘li) orasidagi tunnelda ikki poyezd to‘qnashgandi.
9-aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. Shu bilan birga, metropolitendagi yerosti va yerusti poyezd harakatlarining bir nechta boshqa videolari ham ijtimoiy tarmoqlarda ko‘p bora muhokama qilindi. 28-aprel kuni esa tunnelda to‘xtab qolgan poyezd haqidagi video tarqaldi, unda yo‘lovchilar relslar orqali harakatlanib, bekatga yetib olgani tasvirlangan. 13-may kuni “Amir Temur xiyoboni” bekatida barcha yo‘lovchilar tushirib yuborilgandi.
Izoh (0)