Тошкентда Туркиядан мамлакатда ноқонуний равишда дори воситаларни олиб киришга уринган шахс қўлга олинди. Бу ҳақда Давлат божхона қўмитаси матбуот хизмати хабар берди.
Маълум қилинишича, «Тошкент-Аэро» ихтисослаштирилган божхона комплексининг Контрабандага қарши курашиш ва божхона аудити бўлими тезкор вакиллари томонидан томонидан аввалдан олинган маълумотларга асосан Истанбул—Тошкент йўналиши бўйича учиб келиб, «яшил» йўлак орқали ҳаракатланган К.С. исмли шахснинг юклари божхона кўригидан ўтказилган.
Кўрик давомида унинг юклари ичида божхона ходимининг оғзаки сўровида айтилмаган, дастлабки ҳисоб-китобларга кўра умумий нархи, тахминан, 78 миллион 650 минг сўмга тенг 513 дона турли хил дори воситалари борлиги аниқланган.
Шунингдек, Тошкент вилояти Оҳангарон тумани ҳудудида тезкор тадбир ўтказилганда Ю.Ш. исмли шахс бошқарувидаги Damas’да олиб келинган, Ўзбекистон фуқароси С.И.га тегишли бўлган умумий қиймати 180 миллион сўмлик 6 минг қути «Cefoperazone» номли дори воситаларини харидорга сотилаётган вақтида ходимлар томонидан тўхтатиб қолинган.
Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда.
Аввалроқ Чилонзорда кучли таъсир қилувчи дори воситаларини ноқонуний сотаётган дорихона аниқланиб, жиноят иши қўзғатилгани, Тошкент ва Сирдарё вилоятларида талаб юқори бўлган дори воситаларини қиммат нархда сотишга уринган шахслар қўлга олингани тўғрисида хабар берилганди.
Изоҳ (0)