Efiopiyaning Oromiya hududida sodir etilgan to‘qnashuvlar oqibatida kamida 210 kishi halok bo‘ldi. Bu haqda Efiopiya parlamentining inson huquqlari bo‘yicha komissiyasiga tayanib, “Korrespondent.net” xabar berdi.
Qayd etilishicha, Efiopiya parlamentining terrorchilik tashkilotlari ro‘yxatiga kiritilgan “Oromiya ozodlik armiyasi” jangarilari 18-avgustdan boshlab Oromiya g‘arbidagi amxara xalqi vakillariga hujum qila boshlagan, natijada kamida 150 kishi halok bo‘lgan.
Keyinchalik mintaqada yana bir necha etnik guruhlarning qasd olish hujumlari uyushtirilib, kamida 60 kishi halok bo‘ldi. Etnik guruhlar o‘rtasidagi nizolar yer, suv va boshqa muammolar yuzasidan kelib chiqmoqda.
Birlashgan Millatlar Tashkiloti bosh kotibi Antonio Guterrishning ma’lum qilishicha, Efiopiyada bir million odam oziq-ovqat, suv, uy-joy va dori-darmonga muhtoj. Uning so‘zlariga ko‘ra, gap gumanitar falokat haqida bormoqda, mamlakatda kamida 400 ming kishi ochlik sharoitida yashaydi.
“Ikki milliondan ortiq odam o‘z uylarini tashlab ketdi va millionlab odamlar hayotiy gumanitar yordamga, jumladan oziq-ovqat, suv, boshpana va tibbiy xizmatga muhtoj”, — dedi BMT bosh kotibi. Uning qo‘shimcha qilishicha, Efiopiyada qochoqlar lagerlari vayron qilingan, kasalxona va klinikalarga hujum uyushtirilib, talon-toroj qilingan, elektr va aloqa yo‘q.
“Men shuningdek, gender va jinsiy zo‘ravonliklarning dahshatli holatlari haqidagi xabarlardan juda xavotirdaman. Bunday vahshiy harakatlarni qat’iyan qoralayman”, — dedi bosh kotib.
22-iyun kuni Efiopiyaning Tigray viloyatiga yo‘llangan aviazarba oqibatida 64 kishi halok bo‘lgandi, 180 kishi yaralangan. Harbiylarning bayonotiga ko‘ra, zarba Tigrayni ozod qilish xalq fronti a’zolariga qaratilgan. 4-noyabrdan beri Efiopiya federal qo‘shinlari Tigrayni ozod qilish xalq fronti otryadlari bilan jang qilmoqda. Hukumat mintaqadagi nazoratni deyarli yo‘qotib, urushda yutqazdi.
Izoh (0)