Qozog‘istondagi portlash qurbonlari soni 9 kishiga yetdi. Nazarboyev mudofaa vaziri va Jambil hokimiga qo‘ng‘iroq qildi

Qozog‘istonning Jambil viloyati Taraz shahri tashqarisida joylashgan harbiy ombordagi portlashlar qurbonlari soni to‘qqiz kishiga yetdi, deb yozadi Tengrinews.

“Jambil viloyatining Bayzak tumanida joylashgan harbiy qismdagi portlash oqibatida, so‘nggi ma’lumotlarga ko‘ra, to‘qqiz kishi halok bo‘lgan. Bular FVV, harbiy qism, harbiylashtirilgan soqchilik va harbiy prokuratura xodimlaridir. Bedarak yo‘qolgan to‘rt kishi haqidagi ma’lumotlar aniqlashtirilmoqda”, — deya ma’lum qildi mamlakat Favqulodda vaziyatlar vazirligi rasmiy vakili Talgat Uali.

Dastlabki axborotga ko‘ra, kasalxonalarga Favqulodda vaziyatlar departamentining 49 nafar xodimi kelib tushgan. Voqea joyida vazir rahbarligidagi FVV tezkor guruhi ish olib bormoqda.

Yana bir necha kishi aloqaga chiqmayapti. Qidiruv ishlari amalga oshirilmoqda.

Bu orada Nursulton Nazarboyev mudofaa vaziri Nurlan Yermekbayev bilan telefon orqali suhbatlashdi. Muloqot chog‘ida Xavfsizlik kengashi raisiga Bayzak tumanidagi favqulodda holat oqibatlarini bartaraf etish va mintaqa aholisi xavfsizligini ta’minlash bo‘yicha ko‘rilayotgan choralar haqida ma’lumot berilgan.

Qozog‘iston birinchi prezidenti Jambil viloyati hokimi Berdibek Saparbayev bilan ham gaplashdi.

Qozog‘istonda portlash 26-avgust kuni sodir bo‘lgandi. Voqea joyida yong‘in oqibatlarini bartaraf etish bo‘yicha tezkor shtab tuzilgan, mudofaa vaziri, favqulodda vaziyatlar vaziri, shuningdek, ichki ishlar vazirining o‘rinbosari yetib kelgan.

Avvalroq portlash oqibatida besh askar halok bo‘lgani, jarohatlanganlar soni 90 kishiga yetgani xabar berilgandi. Harbiy omborlar hududida 500 tonnadan ortiq trotil (portlovchi modda) saqlanardi. Harbiy qismda yong‘in davom etmoqda, 1,2 mingga yaqin odam evakuatsiya qilindi. Rasmiylar hodisa sababi sifatida qasddan o‘t qo‘yish versiyasini istisno qilmayapti.