Qozog‘istondagi o‘q-dori omborlarida 26-avgust kuni sodir bo‘lgan portlash oqibatida besh askar halok bo‘ldi, jarohatlanganlar soni 90 kishiga yetdi. Harbiy omborlar hududida 500 tonnadan ortiq trotil (portlovchi modda) saqlanardi. Harbiy qismda yong‘in davom etmoqda, 1,2 mingga yaqin odam evakuatsiya qilindi. Rasmiylar hodisa sababi sifatida qasddan o‘t qo‘yish versiyasini istisno qilmayapti.
“Omborlar Qozog‘istonning Jambil viloyatidagi harbiy qismda joylashgan. Portlashlar oqibatlarini bartaraf etish vaqtida besh harbiy xizmatchi halok bo‘ldi”, — deya xabar berdi Qozog‘iston mudofaa vaziri Nurlan Yermekbayev. Uning aytishicha, yana bir necha kishi aloqaga chiqmayapti, ular qidirilmoqda.
“Voqea sabablari tezkor-tergov guruhi tomonidan o‘rganilmoqda. Biz turli sabablarni istisno qilmaymiz, bu xavfsizlik qoidalarini buzish, o‘z-o‘zidan yonib ketish, kimyoviy reaksiya bo‘lishi mumkin, qasddan o‘t qo‘yish va qo‘poruvchilik ham istisno qilinmayapti”, — dedi mudofaa vaziri.
“O‘q-dorilar omborida 500 tonnadan ortiq trotil bor edi. Bo‘laklarning sochilish radiusi 2 kilometrgacha yetgan” — dedi Qozog‘iston Favqulodda vaziyatlar vazirligi rasmiy vakili Talgat Uali jurnalistlarga.
Mudofaa vazirligi ma’lumotlariga ko‘ra, omborlarda o‘q-dorilarning portlashi to‘xtagan, biroq yong‘in hali davom etmoqda. “Muhandislik o‘q-dorilari yerusti omborida saqlanadi. Omborlarda yerosti saqlash joylari yo‘q. Boshqa turdagi o‘q-dorilar (artilleriya, reaktiv, raketa, o‘qotar qurollar o‘q-dorilari) u yerda saqlanmaydi ”, — deyiladi vazirlik matbuot bayonotida.
Muhandislik o‘q-dorilari — portlovchi va pirotexnik birikmalarni o‘z ichiga olgan muhandislik qurollari vositasi. Ular portlovchi vositalarga, portlovchi zaryadlarga, muhandislik minalariga bo‘linadi.
“Yaradorlar soni 90 kishiga yetdi. Kasalxonaga yotqizilgan olti kishining jarohatlari og‘ir deb baholanmoqda”, — deya xabar berdi “RIA Novosti” viloyat ma’muriyati matbuot xizmatiga tayanib.
“Portlashlar tufayli 1,2 mingga yaqin odam evakuatsiya qilindi. Evakuatsiyaga 300 nafar politsiya xodimlari va 500 nafar Milliy gvardiya harbiylari jalb qilingan”, — deyiladi Qozog‘iston IIV xabarida.
Qozog‘istonda portlash 26-avgust kuni sodir bo‘lgandi. Voqea joyida yong‘in oqibatlarini bartaraf etish bo‘yicha tezkor shtab tuzilgan, mudofaa vaziri, favqulodda vaziyatlar vaziri, shuningdek, ichki ishlar vazirining o‘rinbosari yetib kelgan.
Qurol bilan, shuningdek, boshqalarga xavf tug‘diradigan moddalar va narsalar bilan ishlash qoidalarining buzilishi bo‘yicha jinoyat ishi qo‘zg‘atilgan.
Mavzuga doir:
Izoh (0)