Эфиопиянинг Оромия ҳудудида содир этилган тўқнашувлар оқибатида камида 210 киши ҳалок бўлди. Бу ҳақда Эфиопия парламентининг инсон ҳуқуқлари бўйича комиссиясига таяниб, «Korrespondent.net» хабар берди.
Қайд этилишича, Эфиопия парламентининг террорчилик ташкилотлари рўйхатига киритилган «Оромия озодлик армияси» жангарилари 18 августдан бошлаб Оромия ғарбидаги амхара халқи вакилларига ҳужум қила бошлаган, натижада камида 150 киши ҳалок бўлган.
Кейинчалик минтақада яна бир неча этник гуруҳларнинг қасд олиш ҳужумлари уюштирилиб, камида 60 киши ҳалок бўлди. Этник гуруҳлар ўртасидаги низолар ер, сув ва бошқа муаммолар юзасидан келиб чиқмоқда.
Бирлашган Миллатлар Ташкилоти бош котиби Антонио Гутерришнинг маълум қилишича, Эфиопияда бир миллион одам озиқ-овқат, сув, уй-жой ва дори-дармонга муҳтож. Унинг сўзларига кўра, гап гуманитар фалокат ҳақида бормоқда, мамлакатда камида 400 минг киши очлик шароитида яшайди.
«Икки миллиондан ортиқ одам ўз уйларини ташлаб кетди ва миллионлаб одамлар ҳаётий гуманитар ёрдамга, жумладан озиқ-овқат, сув, бошпана ва тиббий хизматга муҳтож», — деди БМТ бош котиби. Унинг қўшимча қилишича, Эфиопияда қочоқлар лагерлари вайрон қилинган, касалхона ва клиникаларга ҳужум уюштирилиб, талон-тoрож қилинган, электр ва алоқа йўқ.
«Мен шунингдек, гендер ва жинсий зўравонликларнинг даҳшатли ҳолатлари ҳақидаги хабарлардан жуда хавотирдаман. Бундай ваҳший ҳаракатларни қатъиян қоралайман», — деди бош котиб.
22 июнь куни Эфиопиянинг Тиграй вилоятига йўлланган авиазарба оқибатида 64 киши ҳалок бўлганди, 180 киши яраланган. Ҳарбийларнинг баёнотига кўра, зарба Тиграйни озод қилиш халқ фронти аъзоларига қаратилган. 4 ноябрдан бери Эфиопия федерал қўшинлари Тиграйни озод қилиш халқ фронти отрядлари билан жанг қилмоқда. Ҳукумат минтақадаги назоратни деярли йўқотиб, урушда ютқазди.
Изоҳ (0)