Qozog‘iston tashqi ishlar vaziri o‘rinbosari Akan Rahmetullin Afg‘onistondagi Qozog‘iston elchisining “Tolibon” bilan suhbati haqida aytib berdi.
“Bunday muloqotlar siyosiy darajada bo‘lib o‘tmagan. Lekin shuni ta’kidlashni istardimki, bizning Kobuldagi elchixonamiz ma’lumotlariga ko‘ra, “Tolibon” Kobulni egallab olganida harakat a’zolarining ayrimlari bizning elchixona joylashgan hududga kirgan. Qozog‘iston elchisi tashqariga chiqqan. Bu paytda soqchilar bo‘lmagan.
‘Tolibon’ yaqinlashganda, elchi ular bilan gaplashish uchun borgan. Ular: ‘Siz kimsiz, bu qaysi elchixona?’ deb so‘raganda, vakilimiz bu Qozog‘iston elchixonasi ekanini aytgan. Ular: ‘Hech narsadan qo‘rqmang. Qanday ishlagan bo‘lsangiz, shunday davom eting. Siz bizning himoyamizdasiz’, deya javob qaytargan. O‘shandan beri ular elchixonamizni qo‘riqlamoqda. Hozircha faqat shu darajadagi muloqotlar bo‘lib o‘tgan”, — dedi Akan Rahmetullin onlayn brifingida.
Rahmetullinning ta’kidlashicha, Qozog‘iston boshqa davlatlar qatori hamon vaziyatni kuzatmoqda va “Tolibon”ni tan olgani yo‘q.
“Biz Tolibon’ni tan olmadik. Qozog‘istonda biz bu mamlakatdagi vaziyat rivojlanishini diqqat bilan kuzatishda davom etmoqdamiz”,— dedi Rahmetullin Nur-Sultonning “Tolibon”ga nisbatan pozitsiyasi haqidagi savolga javob berarkan.
Uning so‘zlariga ko‘ra, Nur-Sulton BMT Xavfsizlik Kengashining inklyuziv va vakillik hukumati tuzish, milliy ozchiliklar va ayollar huquqlarini hurmat qilish, boshqa davlatlarga tahdid soluvchi guruhlar mavjud bo‘lishining oldini olish, xalqaro qonunlarga rioya qilish zarurligi haqidagi bayonotini qo‘llab-quvvatlaydi.
“Bu qoidalarning bajarilishi Afg‘onistonning yangi hukumati bilan muloqotni boshlash sharti bo‘lishi kerak”, — dedi Rahmetullin.
Qozog‘iston diplomatiyasi vakili ta’kidlashicha, davlat va ijtimoiy tuzilishning eng maqbul modelini Afg‘oniston fuqarolarining o‘zi belgilashi kerak.
Avvalroq “Tolibon” Kobuldagi Rossiya elchixonasini qo‘riqlashni boshlagani haqida xabar berilgandi.
Izoh (0)