«Толибон» Қозоғистоннинг Афғонистондаги элчихонасини қўриқлашга ваъда берди — Қозоғистон ТИВ

Қозоғистон ташқи ишлар вазири ўринбосари Акан Раҳметуллин Афғонистондаги Қозоғистон элчисининг «Толибон» билан суҳбати ҳақида айтиб берди.

«Бундай мулоқотлар сиёсий даражада бўлиб ўтмаган. Лекин шуни таъкидлашни истардимки, бизнинг Кобулдаги элчихонамиз маълумотларига кўра, «Толибон» Кобулни эгаллаб олганида ҳаракат аъзоларининг айримлари бизнинг элчихона жойлашган ҳудудга кирган. Қозоғистон элчиси ташқарига чиққан. Бу пайтда соқчилар бўлмаган.

‘Толибон’ яқинлашганда, элчи улар билан гаплашиш учун борган. Улар: ‘Сиз кимсиз, бу қайси элчихона?’ деб сўраганда, вакилимиз бу Қозоғистон элчихонаси эканини айтган. Улар: ‘Ҳеч нарсадан қўрқманг. Қандай ишлаган бўлсангиз, шундай давом этинг. Сиз бизнинг ҳимоямиздасиз’, дея жавоб қайтарган. Ўшандан бери улар элчихонамизни қўриқламоқда. Ҳозирча фақат шу даражадаги мулоқотлар бўлиб ўтган», — деди Акан Раҳметуллин онлайн брифингида.

Раҳметуллиннинг таъкидлашича, Қозоғистон бошқа давлатлар қатори ҳамон вазиятни кузатмоқда ва «Толибон»ни тан олгани йўқ.

«Биз Толибонъни тан олмадик. Қозоғистонда биз бу мамлакатдаги вазият ривожланишини диққат билан кузатишда давом этмоқдамиз»,— деди Раҳметуллин Нур-Султоннинг «Толибон»га нисбатан позицияси ҳақидаги саволга жавоб бераркан.

Унинг сўзларига кўра, Нур-Султон БМТ Хавфсизлик Кенгашининг инклюзив ва вакиллик ҳукумати тузиш, миллий озчиликлар ва аёллар ҳуқуқларини ҳурмат қилиш, бошқа давлатларга таҳдид солувчи гуруҳлар мавжуд бўлишининг олдини олиш, халқаро қонунларга риоя қилиш зарурлиги ҳақидаги баёнотини қўллаб-қувватлайди.

«Бу қоидаларнинг бажарилиши Афғонистоннинг янги ҳукумати билан мулоқотни бошлаш шарти бўлиши керак», — деди Раҳметуллин.

Қозоғистон дипломатияси вакили таъкидлашича, давлат ва ижтимоий тузилишнинг энг мақбул моделини Афғонистон фуқароларининг ўзи белгилаши керак.

Аввалроқ «Толибон» Кобулдаги Россия элчихонасини қўриқлашни бошлагани ҳақида хабар берилганди.